Castañón emplegó l'asturianu na tribuna d'oradores del Congresu

La vocera de Xuníes Podemos fíxolo pa demandar una solución al conflictu llaboral de la EBHI, con trabayadores en fuelga de fame dende hai 36 díes pa defender 7 emplegos.

L'asturianu tornó a sonar nel Congresu, nesta ocasión dende la tribuna d'oradores, una escena inédita. Foi nuna intervención de Sofía Fernández Castañón na tarde d'ayeri nel Plenu nel alderique sobre una moción d'interpelación urxente del diputáu de Foro, Isidro Martínez Oblanca, sobre la política ferroviaria del Ministeriu de Tresportes, Movilidá y Axenda Urbana tres finar la emerxencia sanitaria del COVID-19.

Al tomar la pallabra, la xixonesa señaló que "enantes de nada, quisiera manda-y tol sofitu y la nuesa solidaridá a los trabayadores en llucha d'EBHI, sociedá anónima", recordando qu'ún de los cuatro qu'empezaron la fuelga de fame hai güei 36 díes caltién la reivindicación, y reclamó "a les autoridaes llocales y autonómiques qu'alcuentren una solución consciente de los tiempos que tamos viviendo nos que tola xente ta faciendo verdaderos esfuercios pa que naide quede atrás". A los diputaos de VOX nun-yos prestó l'usu del asturianu na Cámara Baxa, polo que Fernández Castañón apuntó que "si alguien no lo entiende supongo que es que piensa que es una lengua, así que ya saben, oficialidá".

Maniobra de la empresa

Depués de que los sos trés compañeros tuvieran qu'abandonar la fuelga de fame por motivos de salú, Fernando González Rodríguez ta aguantando en solitariu a pesar de les recomendaciones médiques pa defender los 7 puestos de trabayu que se van perder al nun cumplir European Bulk Handling Installation (EBHI), de la que l'Autoridá Portuaria de Xixón ye máxima aicionista, coles tases de reposición. El plazu pa solicitalo fina güei, según conocieron hai poco los trabayadores, polo qu'a la empresa interesaba-y allarga-y el conflictu énte la pasividá del Gobiernu.