El vascu Matute lleva al Congresu'l conflictu llaboral de la EBHI

|
Oskar Matute reducida

Los cuatro trabayadores zarraos nes instalaciones de la empresa n'El Musel acumulen 16 díes en fuelga de fame.

El diputáu d'EH Bildu, Oskar Matute, partíu sociu d'Andecha Astur na coalición Agora Repúbliques, treslladó una entruga a la Mesa del Congresu pa la so respuesta per escritu sobre'l conflictu llaboral de la European Bulk Handling Installation (EBHI), de la que ye máximu accionista l'Autoridá Portuaria de Xixón. "¿Qué iniciatives camienta tomar el Ministeriu de  Tresportes, Movilidá y Axenda Urbana pa torgar que la empresa EHBI, SA, que vien d’aplicar unillateralmente un ERTE a la so plantía, aprovechando la coxuntura de la crisis de la COVID-19, nun solicite esti añu la tasa de reposición del 100 por cientu que rix en tol seutor públicu, y que llevaría al despidu en diferío de cuatro trabayaores nel 2020 y trés más nel 2021, despidos que se llevaríen a efeuto cuando finen dellos contratos temporales y que sedríen maquillaos pola empresa como finalizaciones de contratos y non despidos?", foron les cuestiones remitíes al Gobiernu estatal.

El vascu tamién aprovechó la so intervención nel Plenu d'ayeri na tribuna del Congresu pa sacar el tema al dirixise a la ministra de Trabayu y Economía Social, Yolanda Díaz Pérez, xornada na que los cuatro trabayadores acumulaben 15 díes en fuelga de fame nos que s'entemaron delles movilizaciones solidaries nel esterior, como una caravana de vehículos per Xixón. Güei cúmplese'l 16 con un aconceyamientu na sede del Serviciu Asturianu de Solución Estraxudicial de Conflictos (SASEC), nel que va ser el primer averamientu de la empresa pa buscar una salida al conflictu.

Na semeya, momentu nel que Matute entruga dende'l so escañu al vicepresidente segundu y ministru de Derechos Sociales y Axenda 2030, Pablo Iglesias.

Contador Estadistiques