Cuatro trabayadores de la EBHI, en fuelga de fame

Caltiénense dende'l miércoles na sede de la empresa semipública n'El Musel pa denunciar 7 despidos que cataloguen de "encubiertos".

European Bulk Handling Installation (EBHI), de la que ye mayor aicionista l'Autoridá Portuaria de Xixón, con un 68 por cientu de participación, presentó un ERTE ensin negociación colos trabayadores, incumpliendo amás alcuerdos llaborales previos. "Aprovechen la coxuntura d'esta crisis para solicitar un ERTE de manera unillateral nel que la plantía cobrará sólo'l 55 por cientu del so salariu cada día que vaya reguláu, y lo que ye más grave, solicitándolo hasta'l 31 d'avientu del 2021, cuando la mesma empresa reconoció que nel añu 2021 la sociedá cubrirá gastos", espliquen los cuatro emplegaos zarraos nel llocal del Comité d'Empresa, Adrián Serrano, Eduardo López Rodríguez, Adrián Rey y Fernando González Rodríguez.

"Pero lo que ye más grave ye que se nos comunicara que, amparándose na COVID-19, la empresa nun solicitará esti añu la tasa de reposición del 100 por cientu que rix en tol sector públicu, y que llevaría al despidu en diferío de cuatro compañeros esti añu y trés más el próximu", una situación que llevó a estos trabayadores a sumar una fuelga de fame al zarru. Dichos contraros, espliquen, serán presentaos pola EBHI como fin de contratu y non despidos cuando lleguen les finalizaciones próximes de los venceyos llaborales temporales, incumpliendo asina l'alcuerdu robláu nel SASEC pa finar la fuelga desendolcada nel 2017 no que respeuta a la plantía mínima na empresa.

Los zarraos demanden la intermediación del Gobiernu, que reconocen como "únicu interllocutor válidu". "Entendemos qu'una simple decisión política pue solucionar en mui curtiu plazu esti conflictu, evitando allargarlu de manera innecesaria y llegar a situaciones futures que seríen dramátiques pa toles partes", aseguren.

Paseos solidarios

Tolos díes, a les 20.30 hores, tán celebrándose paseos solidarios colos trabayadores de la EBHI na playa de L'Arbeyal, na entrada d'El Musel. Les persones qu'acuden guarden en too momentu les midíes de seguridá afitaes nesta crisis sanitaria por cuenta la pandemia de COVID-19, tando en movimientu y non concentraos.