L'usu del idioma pol presidente del país, 'Meyor noticia pal asturianu en 2019'

Los participantes na encuesta valoraron la importancia del emplegu de la llingua asturiana por parte d'Adrián Barbón na toma de posesión y n'otros discursos oficiales.

Iniciativa pol Asturianu entamó l'añu, per sesta ocasión, consultando a la ciudadanía pola 'Meyor noticia pal asturianu en 2019'. La opción más votada ente les 18 propuestes foi 'El presidente d’Asturies usa l’asturianu en dellos actos institucionales y nel mensaxe de fin d'añu', siguida mui de cerca por 'Los diputaos y diputaes na Xunta Xeneral podríen sumar pa la oficialidá', con 'Apruébase’l decretu pa les pruebes d’asturianu nel Marcu Común Européu de Referencia pa les Llingües' en tercer posición.

Dende esti coleutivu "celebramos y tamién agradecemos la participación de los y les internautes nesta encuesta. Si la meyor noticia del 2018 foi qu’el rector de la Universidá echó una conferencia n’asturianu per primer vegada na hestoria, la d’esti añu ye l’usu del asturianu pol máximu representante del Gobiernu d’Asturies. Cada añu que pasa hai mayores y meyores noticies pa la llingua asturiana lo qu’en sí mesmo yá ye una bona noticia”, espresó'l so presidente Iván Llera.

N'Asturies.com tratamos asina la toma de posesión de Barbón del cargu presidente del país.

Semeya obra d'Armando Álvarez.