“Tenemos que facer lo posible pa que la llingua asturiana tenga futuru”, insiste Barbón na toma de posesión

|
Adrián Barbón y Javier Fernández toma de posesión

Adrián Barbón tornó a emplegar l’asturianu nun discursu, nesta ocasión nel de la toma de posesión del cargu de presidente d’Asturies. “Tenemos que facer lo posible pa que la llingua asturiana tenga futuru”, insistió’l socialista na Xunta Xeneral.

Baxo la mirada del presidente saliente, el so compañeru de partíu Javier Fernández, asina como de los ex presidentes Pedro de Silva, Juan Luis Rodríguez-Vigil y Francisco Álvarez-Cascos, y los ministros Luis Planas, qu’al igual que Fernández intervino nel actu, y María Luisa Carcedo, Barbón tomó posesión. “Dexáime ser coraxosu”, reclamó tres prometer el cargu, reivindicando con optimismu que “Asturies tien futuru”.

Nel so discursu incluyó delles reflexones, siendo la primera sobre la historia d’Asturies. “Conózola y reconózome nella, apasióname deprender de los sos aciertos y de los sos errores. Una historia que ta xunida de forma indisoluble a la nuesa cultura, que defendo con arguyu. Les nueses tradiciones, la nuesa forma de ser. Tamién la nuesa llingua”, apuntó.

Darréu, el presidente pasó a usar l’asturianu p’afirmar que “la llingua asturiana ye una seña d'identidá de les xentes d'Asturies. Nun la podemos dexar morrer, tenemos que facer lo posible pa que tenga futuru, pa que la podamos tresmitir a les próximes xeneraciones. Pa que los nietos nun escaezan nunca la llingua de los sos güelos”.

Na imaxe, Barbón estrecha la mano de Fernández, presidente saliente. Semeya obra d'Armando Álvarez.

Contador Estadistiques