El Parllamentu Européu refuga la direutiva sobre los derechos d’autor

La polémica direutiva que llevó a quince wikipedies europees, ente elles l’asturiana, a bloquiar los sos conteníos per delles hores en mou de protesta foi refugada por Parllamentu Européu. Ésta pretendía reformar los derechos d’autor con normes que, afirmen, “estropiaría bultablemente la Internet abierta”.

Dos artículos de la direutiva son los que llevantaron les mayores crítiques tanto d’usuarios como de grandes y pequeñes compañíes d’Internet. El primeru ye’l 11, que permitiría que los medios de comunicación pudieran reclamar pagos a les plataformes dixitales que compartan los mesmos o negar el so usu por éstes, lo qu’obligaría a pidir permisu de manera particular a cada editor dificultando’l llabor de ferramientes como Wikipedia y váltandose asina ún de los pegoyos d’Internet.

Mentes, el 13 afeuta a les plataformes de conteníos, que quedaríen obligaes a filtrar tolos materiales que xuban los sos usuarios pa garantizar qu’éstos respeten los derechos d’autor. “En llugar d'actualizar les lleis de derechos d'autor n'Europa y promover la participación de tola ciudadanía na sociedá de la información, la direutiva amenazaría la llibertá en llinia ya impondría nuevos filtros, barreres y torgues p'aportar a la web”, apunten dende Wikipedia n’asturianu.

“Queremos siguir ufiertando una obra abierta, llibre, collaborativa y de baldre con conteníu comprobable. Llamamos a tolos miembros del Parlamentu Européu a votar en contra del testu actual, a abrir a discutiniu y a considerar les numberoses propuestes del movimientu Wikimedia pa protexer l'accesu a la conocencia; ente elles, la eliminación de los artículos 11 y 13, la estensión de la llibertá de panorama a tola UE y la conservación del dominiu públicu”, demandaben quince wikipedies europees, ente elles l’asturiana, la catalana, la vasca y la gallega, que quedaron bloquiaes ayeri en mou de protesta hasta la votación d’esta mañana. Finalmente les quexes d’usuarios, espertos y compañíes dieron resultáu y el Parllamentu Européu refugaba la direutiva por 318 votos a 278, con 31 astenciones.

Agora’l testu va tener que tornar a la Comisión d’Asuntos Xurídicos de la Xunión Europea, onde se presentarán enmiendes pa la so modificación. La direutiva nueva va ser oxetu d’alderique y votación nel Plenu previstu pa setiembre.