“Tamos valorando la situación a ver qué interesa más al Conceyu de Noreña y al asturianu”, señala Antuña

L’alcaldesa de Noreña, Amparo Antuña, aconceyó esti llunes col abogáu Ignacio Fernández pa estudiar la sentencia del TSXA sobre les ordenances d’asturianu, reunión a la que convidó al edil Antonio Martínez Fernández. Tamos valorando la situación a ver qué interesa más al Conceyu y al asturianu”, señaló tres l’alcuentru.

Fernández treslladó a la cabezalera d’Independientes por Noreña (IPÑ) y al conceyal de Conceyu Abiertu por Noreña, formación qu’impulsó les 'Ordenances municipales pal usu de la llingua asturiana nel conceyu de Noreña' aprobaes nel Plenu del 28 d’abril del 2016 col apoyu de tolos grupos a esceición del PSOE y PP, les sos consideraciones sobre la sentencia del Tribunal Superior de Xusticia d’Asturies (TSXA) qu’anula dicha norma municipal. Como anunció n’Asturies.com el vienres pasáu, señaló la so seguridá en que l’argumentu de que calificar al asturianu como “llingua propia” de Noreña ye declaralu oficial nun se sostién por mor de la sentencia del 2010 del Tribunal Constitucional  sobre l’Estatutu de Catalunya, asina como la dificultá que supón l’ausencia d’un estudiu d’incidencia económica de la ordenanza na Facienda municipal a la hora de recurrir la sentencia.

Tres sentir les esplicaciones del lletráu, Antuña apuntó a esti mediu qu’enantes de tomar decisiones prefier tratar l’asuntu con calma col so equipu de gobiernu, teniendo en cuenta qu’hai de plazu hasta’l 13 de febreru pa presentar un posible recursu de casación. “Tamos valorando la situación a ver qué interesa más al Conceyu y al asturianu”, señaló l’alcaldesa, que tien como opciones recurrir o non recurrir y modificar el testu de la ordenanza cola inclusión del informe económicu.

Nesi sen, la primer edil tien nidio que dichu informe ye la torga principal qu’atopa les ordenances, yá que’l primer argumentu que valora’l TSXA tampoco nun lo comparte. “Nun falen d’oficialidá, sinón d’usu. Les ordenances tienen como oxetivu asegurar l’usu del asturianu nel conceyu y la so divulgación, non declaralu oficial”, afirmó.

Sobre’l recursu presentáu por Luis Miguel Suárez González de manera particular, que’l Partido Popular (PP), con Mercedes Fernández al frente, ta defendiendo como propiu, Antuña nun oculta la so sorpresa: “Primero negaron esi recursu, diciendo que nun teníen nada que ver con él y que fora una persona de manera particular, y agora salen con que sí; con que tán detrás”. Sicasí, asegura que la sentencia “evidentemente hai que respetala”, pero nun dulda de que Noreña va siguir teniendo ordenances d’asturianu.

Na semeya, Antuña nes XXVIII Jornadas Micológicas de Pañeda, celebraes en payares.