“La ordenanza permite que’l que quiera falar n’asturianu pueda; nun obliga a naide”, recuerda Amparo Antuña

|
Amparo Antuña

“Taríemos encantadísimos de que’l PP y el PSOE se sumaren a la propuesta de la ordenanza d’asturianu nueva”, asegura Amparo Antuña, alcaldesa de Noreña que cuenta con aprobar el documentu que sustitúi al anuláu pol TSXA “pronto; en marzu meyor que n'abril”. La primer edil recuerda que’l testu “nun obliga a nadie”.

“La ordenanza permite que’l que quiera falar n’asturianu pueda. Garantiza, nun obliga”, añade la líder d’Independientes por Noreña (IPÑ), que recuerda que la llingua asturiana “forma parte de la nuesa vida y la nuesa cultura. Somos lo que somos”. Ensin esti testu en vigor dende’l martes por decisión del Tribunal Superior de Xusticia d’Asturies (TSXA), l’equipu de gobiernu trabaya agora na redaición del mesmu –que va ser idénticu “con dellos matices”– y nel informe d’incidencia económica col que nun contaba’l documentu orixinal.

La sentencia xudicial basaba l’anulación de les 'Ordenances municipales pal usu de la llingua asturiana nel conceyu de Noreña' aprobaes nel Plenu del 28 d’abril del 2016 col apoyu de tolos grupos a esceición del PSOE y PP, tres la presentación d’un recursu por parte de Luis Miguel Suárez González, militante del PP, en dos puntos: la referencia al asturianu como llingua propia del conceyu, lo que’l TSXA consideraba una declaración d’oficialidá, y l’ausencia d’un estudiu d’incidencia económica na Facienda municipal. Por esta segunda circunstancia foi precisamente polo que, tres asesorase col abogáu Ignacio Fernández, el Conceyu decidió apostar por presentar una ordenanza nueva y non un recursu de casación a la sentencia.

“Nós creemos que l’asturianu ye un patrimoniu de toos. Nun pidimos la oficialidá nel conceyu, namái’l so usu y eso queremos remarcalo bien nel documentu nuevu”, que va incorporar namái unes pequeñes modificaciones nesi sen. Tamién va incluyir el demandáu informe “d’Intervención, y tamién otru de Secretaría”, esplica Antuña, que nun quier dexar nengún cabu sueltu.

Izquierda Xunida (IX), Foro y Conceyu Abiertu por Noreña, formación qu’impulsó la ordenanza d’asturianu, yá confirmaron el so sofitu a la decisión de l’alcaldesa, que, ensin marcase plazos, espera poder aprobala “pronto; nel Plenu de marzu meyor que nel d’abril”, añadiendo al testu’l sofitu, si fora posible, del PP y el PSOE. “Taríamos encantaos de que se sumaren a la propuesta”, aseguró.

Contador Estadistiques