“Hai una sentencia del Constitucional incuestionable: poner llingua propia nun significa declarala oficial”, afirma l’abogáu Fernández

Esti llunes van aconceyar en Noreña l’alcaldesa Amparo Antuña y l’abogáu Ignacio Fernández pa tratar la sentencia del TSXA qu’anula les ordenances d’asturianu. El lletráu refuga'l primer argumentu del tribunal y asegura que “hai una sentencia del Constitucional incuestionable: poner llingua propia nun significa declarala oficial”.

Fernández, del bufete Prodis Abogados, afirma tar “radicalmente en contra” de la consideración que fai la sentencia del Tribunal Superior de Xusticia d’Asturies (TSXA) del artículu 1.1 de les Ordenances municipales pal usu de la llingua asturiana nel conceyu de Noreña, que reza que “la llingua asturiana o asturianu ye, xunto al castellanu, la llingua propia del Conceyu de Noreña, de l’Alministración llocal y de les corporaciones públiques que d’ella dependen”, al entender qu’incorporar esi “xunto” y referise a “llingua propia” supón da-y al idioma un rangu d’oficialidá, pa lo que l’Ayuntamientu nun tien competencia. “Esiste xuridisprudencia del Tribunal Constitucional cola sentencia del 2010 sobre l’Estatutu de Catalunya. Ye incuestionable que referise a una llingua como llingua propia nun significa declara oficial”.

El segundu argumentu usáu pol TSXA pa valtar les ordenances ye la necesidá d’un estudiu d’incidencia económica na Facienda municipal dientro de la normativa d’estabilidá presupuestaria, dalgo que Fernández reconoz que nun s’inclúi, anque puntualiza que l’impautu financieru de les mesmes “ye ínfimu, por nun dicir nulu”. A les 13 hores del llunes, l’abogáu va treslladar a l’alcaldesa dambos asuntos y a poner sobre la mesa los posibles pasos a siguir, que van dende poner un recursu de casación a presentar un testu nuevu modificáu.

“La decisión última correspuende al gobiernu municipal”, apunta Fernández, que nun quier entrar en valoraciones sobre la fórmula más afayadiza pa salvar la situación, anque entrugáu sobre les opciones d’algamar la razón no que respeuta al artículo 1.1 de les ordenances, considera que “hai munches posibilidaes”.