La Conseyería de Cultura declárase “satisfecha” cola sentencia

La Conseyería de Cultura y Turismu ta satisfecha col fallu xudicial porque “refuerza la decisión adoptada pol Consorciu pa la Xestión del Muséu Etnográficu de Grandas de Salime”.

Cultura entiende que la sentencia considera probáu que la relación llaboral de Naveiras col Consorciu yera d'alta direición y nun se trataba d'una relación llaboral ordinaria. “Con éses considera probáu que realizó actos y negocios xurídicos de too tipu como direutor”, afirmen. La sentencia, señalen, tamién considera probada la naturaleza xurídica d’altu cargu de la relación que venceyaba a Naveiras col Consorciu.

Dende la Conseyería de Mercedes Álvarez afirmen que la sentencia torna categóricamente la pretensión de nulidá del despidu qu'invocó la representación llegal de Naveiras, “pues considera que nun se probó de nenguna manera que la estinción del contratu obedeciera a circunstancies inconfesables nin de calter políticu refugando la pretendida vulneración de los sos derechos fundamentales”.