El Bloque esixe la realmisión

El voceru del Bloque por Asturies, Pablo Fernández, esixó que Pepe El Ferreiro seya restituyíu "de momentu" nel so puestu de direutor del Muséu Etnográficu de Grandas de Salime.

Pablo Fernández fixo estes declaraciones a Europa Press, tres conocese la sentencia xudicial que declaró improcedente el despidu d’El Ferreiro per parte del Consorciu pa la Xestión del Muséu Etnográficu de Grandas de Salime.

El dirixente de Bloque esixó a la conseyera de Cultura y presidencia del Consorciu, Mercedes Álvarez, y a la cuadriella "que se dedicó a echar "basura" sobre El Ferreiro que-y restituyan nel cargu y "que-y pidan perdón por tol dañu que-y fixeron".

Tamién pidió a Mercedes Álvarez que cavilgue sobre la so actitú "improcedente" y que dimita. "Gobernar de forma caciquil nun estáu democráticu tien que tener los sos costos", concluyó.
 
IU diz que foi una "cacicada"
 
Izquierda Unida d'Asturies felicitó güei a El Ferreiro. En declaraciones a Europa Press, fontes de la formación manifestaron que'l fallu supón qu'un xuez confirma que la decisión de la conseyera de Cultura, Mercedes Álvarez, foi "una cacicada". IU recordó que'l direutor xeneral de Desarrollu Rural y representante d'IU nel Consorciu del Muséu, Ángel Luis Álvarez, votó en contra del so despidu.