Iglesias: “Aína aporta un proyectu coherente de futuru pal nuestru pueblu”

N’abril diose a conocer en sociedá’l movimientu organizativu Aína, agora en plena de campaña d’afiliación cola previsión de celebrar n’ochobre’l I Congresu Nacional, de calter fundacional. Un proyectu políticu nuevu p’Asturies y dende Asturies del que nos fala Lluis Aique Iglesias Fernández (Sotrondio, 1967), ún de los sos promotores.

¿Cómo ta siendo la respuesta ciudadana a la llamada d’afiliación?

Ta siendo mui bona. Llevamos dos selmanes y tolos díes tenemos nueves persones afiliaes que nos cuenten que-yos presta muncho esti proyectu, lo serio que se ve, lo necesario que lo sienten. Ochobre ye’l mes que decidimos pa celebrar el congresu fundacional d’Aína y, a esti ritmu, pa mediaos de setiembre vamos llegar al mínimu d’inscripciones que nos marquemos.

¿Cuál ye l’oxetivu mínimu pa convocar el congresu fundacional?

Preferimos nun ponemos a dicir númberos que namás son una referencia interna pa nós. Lo que sí podemos dicir ye qu’en dos selmanes yá contamos cola metá d’afiliaes y afiliaos que nos punximos de meta pa saber qu’esti proyectu va contar con un sofitu ciudadán importante. Con esti aval, que nos da puxu pa siguir dándo-y forma a la organización, alloñámonos del aventurismu políticu porque entamamos pisando tierra firme.

D’esi I Congresu Nacional saldría un partíu políticu “pensáu dende Asturies y p’Asturies”. ¿Por qué ye importante nesti momentu contar con una fuercia que ponga la mirada nel país?

Ye importante tener una fuercia asina en tou momentu. N’Asturies llevamos en crisis crónica dende los años 80 y los y les alministradores d’esti país namás tienen paracetamol y tirites en botiquín. Dicimos alministradores porque nun gobiernen nada, namás alministren les migayes que-yos dan y con eso yá tán contentes. Nun pues tener un proyectu de futuru si nun tienes con qué lu arrancar, si nun tienes competencies sobre los problemes de la to comunidá nin tienes control fiscal, d’ingresu de perres, que te permita establecer prioridaes. Dicen, por poner un casu, qu’hai que vertebrar Asturies. Pero depués tamién dicen que nun quieren les competencies sobre’l sistema ferroviariu asturianu. ¿Entós cómo van vertebrar Asturies si nun son a poner les condiciones pa crear trabayu y si nun tienen un plan d’infraestructures? ¿Dalguién piensa que les families van quedar en Cangas del Narcea o Degaña por un cheque-bebé y unes rebaxes fiscales?

Llevamos asina tola vida, con eternidaes como’l soterramientu de Feve en Llangréu o la variante Payares, con esactamente los mesmos problemes qu’hai 20, 30 y 40 años. ¿Por qué? Porque nun somos responsables de les nuestres vides y los nuestros asuntos. Porque arrenunciemos a gobernamos y tamos esperando a ver cuándo quieren danos qué dende Madrid.

Pero nunca ye tarde, siempres hai un camín que siguir. Por eso ésti ye’l momentu más importante de tola historia d’Asturies pa contar con una fuercia que ponga la mirada nel país, porque podemos empezar a garrar el nuestru futuru nes nuestres manes. Mañana, el momentu más importante sedrá mañana.

¿Cuáles seríen los siguientes pasos a dar una vegada puesta en marcha la organización?

Anguaño conocemos los problemes y sabemos qué Asturies buscamos: una Asturies que se quiera y conoza, que conoza les sos potencialidaes, que conoza los recursos que siempres tuvo y los recursos que tienen qu’ofrecer el conocimientu y les tecnoloxíes más modernes, una Asturies onde la mocedá vea presente y futuru, una Asturies onde la xente lleve una vida digna, en llibertá y igualdá d’oportunidaes. Pa ello tenemos diez puntos quizaleros, un marcu d’orientación básicu, que yá fixa la nuestra visión sobre la realidá política, económica y social d’Asturies. Cuando llegue’l congresu tenemos que llenar esi marcu. D’ehí tien que salir una executiva, unos grupos de trabayu, unes estratexes y unes llinies programátiques. A eso llámase meter la llave nel contactu. Depués queda munchu trabayu pa llevar eso a tola sociedá asturiana. Xirar la llave en contactu y arrancar el motor. Lo demás ye poner un pie detrás d’otru y triar el camín, que lu hai.

Les eleiciones nacionales de mayu tán nel horizonte. ¿Qué idea tienen los promotores d’Aína al respeuto?

N’Aína tenemos una idea de país que nun se mide en ciclos electorales sinón con parámetros d’oportunidá y utilidá. Nun fundemos esti proyectu por mor d’un afoguín o de la frustración por carencies recientes o vieyes. Esti accionar yá vimos que lleva al fracasu y a quemar a la militancia y a tola xente que pose enfotos y esperances nun proyectu como ésti, de futuru pal pueblu asturianu. Cuando mos presentemos va ser porque pensemos que tenemos opciones series de ser útiles a tola sociedá.

¿Qué aporta Aína al panorama políticu asturianu?

Aportamos aire. Asturies ye como una casa que lleva munchu tiempu, cuarenta años, ensin abrir les ventanes. Los partíos políticos mayoritarios son una cadarma que sostién puestos de trabayu clientelares y engárriense nesti territoriu en función de dinámiques de fuera, que nun tienen que ver colos problemes del país. ¿Cómo pue ser que la candidata a presidenta d’Asturies por un partíu del estáu soltara en campaña que los toros son una seña cultural d’Asturies? ¿Cómo pue ser qu’un diputáu de la Xunta Xeneral diga que la fiesta los toros ye quizalera pa la ganadería? Habría que pregunta-yos qué ganadería, porque si quieren defender el toru como seña cultural y bien económicu, igual tendríen que presentase por otru sitiu en vez de por Asturies.

¿Cómo pue ser qu’un conceyal de Xixón salga a sofitar una manifestación contra la cooficialidá que xuntó a siete persones (él incluyíu), critique ufiertar una asignatura qu’escueyen voluntariamente decenes de miles de families asturianes cada añu y diga qu’él sí sabe interpretar el sentir de tolos asturianos? Dizlo porque lo tien que dicir, porque ye’l discursu que-y manden dende Madrid (xunto con xente candidata que ta obligada a aceptar ensin gorgutar). Pero ye qu’hasta’l gran ‘asturianista’ que ye Barbón calla como un afogáu cuando toca defender los intereses d’Asturies énte Madrid. ¿Cómo pue ser que’l gobiernu de Madrid dexe fuera a Asturies del mapa de les futures autopistes ferroviaries, eses que van llevar en tren les mercancíes a los puertos, si esi tráficu n’Asturies representa’l 10 por cientu de tolo que se mueve nel estáu español y el puertu de Xixón ye’l cuartu de tol estáu por tráficu ferroportuariu y el d’Avilés ye’l sétimu? ¿Pa qué dicíen que valía la variante de Payares, entós? ¿Pa qué val recuperar, entós, el despachu de Belarmino Tomás? Adrián Barbón sabe remanar mui bien los símbolos, pero tres d’esi usu nun hai un programa de gobiernu coherente, progresista y independiente, namás hai fumu. Barbón ta quedándose nel folclorismu.

Pero estos son namás dellos exemplos que demuestren qu’esos partíos estatales, independientemente de si se dicen asturianistes o españolistes, nun tienen un proyectu p’Asturies, pensáu namás dende Asturies y p’Asturies. Y eso ye lo qu’aporta Aína, un proyectu coherente de futuru pal nuestru pueblu.

Venimos d’un momentu de ciertu desencantu pol fracasu del procesu de reforma del Estatutu d’Autonomía. ¿Qué análisis faen al respeuto?

Ye normal esi sentimientu de desencantu depués del circu que montaron les persones que taben y nun taben ‘supuestamente’ negociando. Pero cuando 27 diputaos y diputaes de 27 que se necesitaben pa facer la reforma nun son a ponese d’acuerdu en cuestiones democrátiques mínimes, como facer cumplir l’artículu 3.2 de la Constitución española, hai que plantease qué capacidá real de facer política tienen toes eses persones. Y lo triste ye que se ve que nun se-yos puen pidir les reformes polítiques y económiques que necesita Asturies pa siguir avanzando nel procesu que nos faiga ser a nós, a los propios asturianos y asturianes, los y les responsables de les nuestres vides y del nuestru futuru. Y nun queremos yá entrar a analizar el llabor d’aquelles 18 que nun quixeron nin sentase a una mesa de negociación. Lo importante pa nós ye acabar con esa dinámica, esos topes y eses lleis del embudu que ye anguaño la política asturiana. Aína vien a esbrozar esi camín que sí ta ehí.

¿Ven posible la oficialidá na llexislatura próxima?

La última encuesta independiente da les 27 diputaes a la suma d’IX, Podemos y PSOE. Si Aína decide presentase estes autonómiques del 2023 porque piensa qu’asina va ser útil p’Asturies, puen ser más de 27. Les persones que quieran enzancar el procesu, nesi casu, van tener qu’amosar una capacidá d’inventiva mui alta. Pero independientemente d’encuestes y votaciones, lleva tiempu abondo dándose un cambéu cultural fondu na sociedá asturiana, que necesita autoafirmación pa poder siguir alantre, pero que tamién ta cada vez más convencida de que la cooficialidá ye una cuestión de derechos humanos y de convivencia n’igualdá. Por eso, pue tardar un pocoñín más o menos, pero l’asturianu y el gallego-asturianu van ser oficiales xunto col castellán. De xuru.

¿Hai temor a un posible vuelcu eleutoral hacia la derecha n’Asturies?

Temer ye una palabra mui mala p’andar en política. O pa la vida en xeneral. Pue esmolecer, pero dar mieu, nunca. Poco fizo Barbón pa solucionar los nuestros problemes. Sicasí, los y les asturianes tienen del presidente asturianu una bona percepción pola xestión del andanciu del COVID. Si la derecha tuviere persones en vez de marionetes y tuviere programa, igual podía pensar en ser alternativa n’Asturies. Pero por nun tener, los partíos conservadores nun tienen candidata o candidatu; nun se sabe cuál de los dos va ser hasta que lo decida Madrid. La estrema derecha nun gurguta, la so política ye destruyir lo poco d’autogobiernu qu’hai y aceptar disciplinadamente lo que diga’l deu divín del líder supremu. Podría dicise qu’hasta ye una pena lo que pudo llegar a ser Foro. Tiraron tol caudal políticu cuando decidieron pasar de ser útiles a ser inútiles: cuando yá teníen controlada con 3/5 cómo diba ser la futura cooficialidá que dicíen querer, meten unes desixencies fiscales pa quedar ensin fiscalidá, cooficialidá o control de la cooficialidá. Nun ye que fueren meyores o peores que los otros trés partíos de la supuesta negociación, pero yeren los que más necesitaben una victoria y al final nun la quixeron. Resumiendo: nel casu improbable que la derecha ganare n’Asturies, la felicidá diba dura-y dos telediarios por incomparecencia, pola so falta de proyectu y porque nesta tierra esiste una memoria histórica sobre les consecuencies que tien dexar que la derecha ‘xestione’ les nuestres vides.

Pa finar, ¿ye un momentu pa la ilusión dientro del asturianismu políticu?

Nun concebimos la política, l’actividá de lluchar pol bientar de les ciudadanes y ciudadanos, ensin ilusión. Tamos enfotaos en que l’apaición d’Aína ye una noticia ilusionante pa la sociedá asturiana en xeneral y pal asturianismu políticu en concreto. Los mensaxes que vamos recibiendo de la xente que s’avera a nós son d’una ilusión recuperada. Y eso, pa nós, ye entá más ilusionante.

Queremos dicir a tola xente d’Asturies, la que nació equí y la que decidió quedar a vivir equí, qu’Aína llega con vocación de serviciu a la sociedá. Pidimos a les asturianes y asturianos qu’el so derechu y deber ciudadanu nun quede nel actu de votar cada cuatro años, que vayan más allá y pidan de contino responsabilidá a los partíos políticos que voten, porque los votaron pa que la so vida seya meyor y más xusta equí y non pa que lo seya n’Andalucía, Madrid, Euskadi, Galicia o Cataluña, igual que l’alcalde de Grau tien que trabayar por Grau, non por Llangréu. Si la xente que s’afilie a Aína decide qu’el partíu ta preparáu pa presentase yá, esperamos de les persones que nos voten y, sobre too, que nos pidan responsabilidaes a cada pasu del camín por elles mesmes, pola so descendencia y pol conxuntu la sociedá.

Na semeya, Iglesias, a la izquierda na primer filera, con otros promotores d'Aína.