El Congresu Fundacional d'Aína va celebrase'l 6 de payares en Corvera

Los promotores del proyeutu retrasen la fecha p'habilitar un espaciu d'un aforu mayor.

La importante cantidá d'inscripciones recibíes pa participar nel I Congresu Nacional d'Aína, de calter fundacional, obliga a modificar planes sobre la marcha. Previstu de primeres pa lo último d'ochobre, la necesidá d'una instalación más afayadiza p'acoyer al altu númberu previstu d'asistentes, más d'un centenar a falta d'unes díes pa zarrar el procesu, el 90 por cientu de la cifra considerada "óptima" nun primer momentu, lleva a retrasar la so celebración al domingu 6 de payares.

El llugar escoyíu pa poner en marcha esti proyeutu políticu pensáu p'Asturies y dende Asturies, "que vien a ufrise como espaciu de reorganización del asturianismu políticu dende la izquierda, los movimientos sociales y el soberanismu", apunten los promotores, ye Corvera. Nes xornaes próximes va informase del espaciu concretu y del horariu, mentes que sigue abierta la inscripción p'asistir a esti Congresu Fundacional hasta'l vienres, polo qu'animen "a tola xente que comparte les sensibilidaes qu’Aína espresa a nun dexar pasar la oportunidá de participar" nél y "apurrir el so granín d’arena" a que dea'l pasu.

Otra manera, tamién va abrise la páxina web oficial del partíu nes selmanes vinientes, onde van dir comunicándose de les novedaes sobre l'actu fundacional.