El proyeutu políticu asturianu Aína echa a andar cola celebración del so Congresu Fundacional

Más d’un centenar de afiliaos con derechu a voz y votu van participar na mañana del domingu en Corvera nel primer Congresu Nacional d’Aína, de calter fundacional, un proyeutu políticu pensáu p’Asturies y dende Asturies. Los presentes van aldericar les ponencies y enmiendes presentaes, y van escoyer la Mesa Nacional.

El llabor del grupu promotor d’Aína de los meses últimos, que llevó a entamar una esitosa campaña d’afiliación, desemboca esti domingu en Les Vegues na celebración del primer Congresu Nacional. En Les Vegues, nel Teatru El Llar, ta convocáu’l centenar llargu de persones que quixo aportar al proyeutu pa esti domingu "poner los finxos pa un nuevu partíu políticu que tenga por enfotu proponer idees nueves y caltenga'l filo coloráu del asturianismu que nacía nos años 70 nesti país".

A les 9 hores van abrise les puertes pa la recoyida d’acreitaciones, cola hora d’entamu programada pa les 10. En primer llugar van facese presentaciones, pa depués pasar a aldericar y votar les cuatro ponencies del congresu (ideolóxica-política, estratéxica, organizativa y d’estatutos) y les enmiendes propuestes polos afiliaos –tienen de plazu hasta güei–.

Por último, va escoyese la Mesa Nacional, encargada de la construcción orgánica del partíu. Una xinta popular de xermandía va poner el ramu a una xornada cargada d’enfotu y ilusión pol futuru.