Aína entama una campaña d’afiliación cola intención de celebrar el so congresu fundacional n’ochobre

El movimientu organizativu Aína sigue la so fueya de ruta. Llueu de presentase n’abril y organizar el so primer actu públicu en mayu, agora entama una campaña d’afiliación con ochobre como horizonte, mes nel que ta previsto celebrar el I Congresu Nacional de calter fundacional d’algamar un númberu necesariu de sofitos que valide’l proyeutu.

El 30 de setiembre ye la fecha tope pa formalizar l’afiliación al traviés d’una fueya física o dixital que se va poder descargar calcando nesti enllaz o nes redes sociales de la organización. “Esti pasu ye’l puntu nel que'l proyectu tien qu’algamar la masa crítico abondo cola que se valide y cola qu’entamar a da-y forma al partíu y a xenerar dinámiques de trabayu que piensen nesa meyor versión d’Asturies na que toes y toos querríemos vivir”, apunten dende’l grupu promotor.

El I Congresu Nacional d’Aína, de calter fundacional, celebraríase n’ochobre y pa participar nél y tomar voz ye necesario cumplir col procesu d’afiliación. “Dende Aína animamos a tola xente con enfotu nello a sumase a esti proyectu, a dar un pasu alantre y a inscribise. Queremos caleyar xuntes porque sabemos qu'#HaiCamín”, espresen les persones tres esta iniciativa.

Aína preséntase como “una organización política que fai un llamáu a la reconstrucción d'un espaciu propiu dende'l soberanismu, la izquierda y el feminismu, que tenga como exes la defensa del territoriu, los derechos humanos y los servicios públicos, la reindustrialización caltenible y l'internacionalismu…, mandándose pa too ello d'un apueste pola democracia participativa”.