blog de Josep Carles Laínez

Atalantamos que les nueses vides son orixinales, pero ye namái una creencia, como a quien-y da en creer en xanes o n’ovnis. La única singularidá de la vida radica nes caxigalines; el restu, una cadarma que nun nos dexa mover. Sobre un esquema xeneral, asítiense les pieces concretes de caún de nós: de piel p’afuera, abultamos únicos; de piel p’adientro, más únicos aínda. Sicasí, vistos en planu cenital, o güeyando los nuesos vectores, somos seres predecibles; prefiguraos; monótonos. Cencielles formigues que nun se distinguen les unes de les otres.

Vi en dos sesiones la serie Before del direutor norteamericanu Richard Linklater, daquién avezáu a les producciones d’ampliu alcance: trece, venti años…, que me fain consideralu un home optimista. Before ye una triloxía (pol momentu) separada en dos periodos de cásique una década. Los protagonistes, los mesmos; la historia, la mesma; la intensidá, variable; l’impactu, esperable.

Atención: spoiler

¿L’amor ye dexar que l’otru nos destruya? Ye una entruga ambivalente nun tiempu nel que medra la violencia contra les muyeres, sobre manera a manes de les sos pareyes, y en ciertes cultures nun valen tanto como un home. Sicasí, esa idea ta nel fondu de bien d’obres lliteraries, d’un ciertu imaxinariu que nos embruxila aínda, y que, col posu románticu que les víctimes pémeque nun conocen, trescala la nuesa realidá.

Les histories de vampiros nun son historia. Pue tar perdocumentáu l’episodiu, la novela orixinaria sustentada en fontes misterioses, el cuentu con un ambiente perfechu de sieglu XIX o d’Edá Media, pero, magar toles semeyances cola realidá, les histories de vampiros, como dicíemos, nun cunten historia; ello ye, el so rellatu nun pertenez al mundu de la ciencia. Les películes basaes neses noveles tampoco; menos, quiciabes, pos l’aportación de lo visual avasalla cualquier otra cosa, y sobre manera nun xéneru como’l fantásticu.

Decadente ye Only Lovers Left Alive ([Namái los amantes sobreviven], Jim Jarmusch, 2013). Ta empapáu de decadencia cualquier rexistru qu’utiliza’l film: el visual, el musical, el narrativu… Remítennos toos a un tiempu anterior a nós; quiciabes el rellatu asocede nesti momentu –o naquel instante de 2013, de la que’l llargu foi rodáu–, pero fala d’otra dómina, sabémoslo, y por eso esprésense dende l’ayeri los recursos del director, y les imáxenes que recibimos selemente, y la música y los versos, como’l meyor homenax a la idea que lo eterno vien siempre del pasáu.