Un besu en Central Park

Atención: spoiler

Aínda pienso, cásique un mes depués de visionala, na cabera película de Woody Allen. Café Society nun ye una obra d’arte, nin lo meyor del direutor, nin tampoco nun pue dicise que tenga 'ánxel', 'maxa' o 'duendu', pero toca una de les fibres humanes más fonderes, como les pantasmes, y d’ello consigue un poder que, si pases mala nueche, avasalla. Una rellación atopadiza, un amor imposible, un adiós ensin concesiones, kilómetros y años y formes de vida que desapaecen, nuevos rostros, nuevos alcuentros, y la despidida. En Central Park, los antiguos amantes bésense una vez porque nun quieren facer otro. Ye un brindis al sol: un besu p’alcordar los mesmos besos de la que yeren más xóvenes, pos esti d’agora, esti que va ser l’últimu, pertenez a otru paisaxe, y duel porque nun ye un besu de promeses, sinón de conclusiones. Ella da-ylu, y diz daqué asemeyao a “¿confórmeste con esto?”. Pero él nun se conforma, y entós bésala, y abrázala, y suena la música, y Central Park torna a ser el parque de la humanidá entero, de toos nós, que dimos tamién un besu na adolescencia, y aínda esperamos pol besu que zarre lo que nun tien pieslle, porque les coraes nun dexarán d’arder mentanto vivamos. Con too y con eso, querríemos el nuesu Central Park: la vida ye curtia, y el deséu nun se gasta. Los protagonistes de cualquiera d’esos besos fuera del mundu, atemporales, saben que nun hai futuru na so historia; sicasí, esi besu servirá siempre pa confirma-yos que l’amor d’antaño verdaderamente esistió, que nun foi un engañu; más entá: qu’esiste aínda, y que nada podrá tresformalu en cosa gris; siempre será un suañu d’imposibles. Esi ye’l solu trunfu sobre’l tiempu, ello ye, la victoria de la perda. Porque, a vueltes, namái disponemos d’aquello que perdimos, llámese Kristen Stewart…, o llámese, cenciellamente, Ana.