Tierra y sangre

Les histories de vampiros nun son historia. Pue tar perdocumentáu l’episodiu, la novela orixinaria sustentada en fontes misterioses, el cuentu con un ambiente perfechu de sieglu XIX o d’Edá Media, pero, magar toles semeyances cola realidá, les histories de vampiros, como dicíemos, nun cunten historia; ello ye, el so rellatu nun pertenez al mundu de la ciencia. Les películes basaes neses noveles tampoco; menos, quiciabes, pos l’aportación de lo visual avasalla cualquier otra cosa, y sobre manera nun xéneru como’l fantásticu. Tampoco nun lo fai, poro, una de les caberes reinterpretaciones del mitu: Dracula Untold ([Drácula nunca contáu], Gary Shore, 2014), que nada tien que ver cola novela de Bram Stoker, ni con adautaciones a la pantalla, y que, al contrario, entraría nel ámbitu de les “precueles”: el Drácula previu a Drácula.

Con too y con eso, si lleemos la película dende un puntu de vista diferente, hai elementos que resulten mui llamadores. Alluguémonos nel momentu históricu precisu: l’imperiu otomanu, de fe musulmana, estiéndese per Asia y pretende facelo tamién per Europa; non en devanéu, nel so puntu de máxima espansión aportará a sitiar Viena en 1529 y inclusive nel yá cercanu 1683. A títulu tradicional, yera un conflictu ente un imperiu onde la islámica yera la relixón mayoritaria, y diverses naciones, en teoría cristianes, que defendíen el so territoriu; y digo “en teoría” porque nel sieglu XVI la persecución de los llamaos “bruxos” y “bruxes” n’Europa taba nel so apoxéu, ello ye, el paganismu residual, persiguiu y ocultándose, yera la relixión aínda de miles de los nuesos antepasaos: taba ehí con puxu, y l’amuesa de la so vitalidá yeren les fogueres y los mártires.

¿Cuál ye’l desencadenante d’esti nuevu Drácula? El fechu de nun aceutar esti personaxe la solicitú del sultán Mehmed II de dar 1000 niños pa lluchar nel exércitu turcu. Énte la negativa de Vlad III, la guerra y les presumibles invasión y destrucción abulten la consecuencia pa quien s’atreve a oponese a les pretensiones del toupoderosu sultán. Sicasí, el belicosu y cruel Vlad l’Empalador yá nun confía nes sos fuerces nin na capacidá de resistencia de la xente d’él…

Velequí onde entra esa llectura que mentaba, una llectura non terrorífica nin histórica, sinón metapolítica y relixosa, mecigayu de paganismu que se confunde col “satanismu”: Vlad ve tan cercana la derrota que siente que’l Dios cristianu lu abandonó, y que d’esti nun pue venir la victoria. Decide, poro, dir a la gueta d’un vieyu nuna fortaleza: esi home de tiniebles vive pero al empar ta muertu, atiende pa les fuerces de la naturaleza, dispón d’animales totémicos nos que se tresfigura: l’esperteyu, el llobu…, y guarda un conocimientu malditu. Con esi poder y esa sabiduría paganes realcontraes, Vlad  llogrará estrozar l’exércitu de Mehmed II, y salvar les sos tierres.

Sin embargu, el so pactu coles fuerces divines del pasáu, que los monxes cristianos atalantaben derrotaes y consideren malines, conviértelu non nun héroe, sinón nun monstru, y merez el castigu y la conderga. Elli, sicasí, namái yera fiel a la so familia y al so pueblu, que, enantes d’adorar a un dios oriental, rendíen cultu a les divinidaes d’aquelles tierres, a los verdaderos d’aquella rexón, a los dioses d’Europa.