Primer xornada ensin finaos con COVID-19 dende'l mes d'ochobre

|
Gráficu finaos COVID-19 segunda y tercer fola

El domingu rexistráronse 127 contaxos, con una positividá del 5,92. Cangues d'Onís entra en riesgu estremu, nel que siguen Ḷḷena y Piloña.

Los datos últimos tresmitíos pola Conseyería de Salú ofrecieron la bona noticia de qu'ayeri foi la primer xornada ensin muertes con COVID-19 en cinco meses. La última vegada que nun había que llamentar perda nenguna n'Asturies foi'l 11 d'ochobre.

Nesti tiempu finaron n'Asturies 1.434 persones, con payares como mes más prietu de tola pandemia. Anguaño'l númberu total de víctimes asciende a 1.799, produciéndose la primer víctima'l 12 de marzu.

384 hospitalizaos

Hai 278 pacientes hospitalizaos con confirmación o sospecha de COVID-19, a los qu'hai que sumar 106 que tán na UCI. Son 9 y 1 más que'l xueves, de manera respeutiva.

Na xornada d'ayeri detectáronse 127 casos nuevos tres la realización de 2.635 pruebes de diagnósticu d'infeición activa. La tasa de positividá asitióse nun 5,92 por cientu.

Nuevos zarros perimetrales

Les restricciones de nivel d'alerta 4+ van activase'l miércoles en Cangues d'Onís depués del empeoramientu de los sos datos epidemiolóxicos. Súmase asina a Ḷḷena y Piloña, onde se prorroguen 14 díes más les midíes, entes les que ta'l zarru perimetral del conceyu o'l pieslle del interior de los chigres.

Pa consultar los indicadores de tolos conceyos y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, gráficu del Observatoriu de Salú n'Asturies de les muertes con COVID-19 na segunda y tercer fola.

Contador Estadistiques