El predominiu de la variante inglesa fai aumentar la media diaria de casos de coronavirus

Pasó de 135 a 144 na selmana última, frayando la tendencia qu'arrancó col entamu de febreru.

Los téunicos de Salú Pública consideren qu'esti frenu na baxada de la tercer fola de la pandemia de COVID-19 ta venceyáu cola presencia n'Asturies de la variante inglesa del coronavirus SARS-CoV-2, que yá representa'l 96,4 por cientu de los casos diagnosticaos anguaño frente al 7,6 por cientu de los detectaos na tercer selmana del añu. Énte'l tipu de virus circulante, d'alta capacidá de tresmisión y una posible mayor gravedá que la cepa china orixinal, les autoridaes sanitaries aconseyen aumentar la precaución y disminuir tanto la movilidá como la interaición social.

Nos 7 díes últimos rexistráronse 1.005 contaxos polos 944 del anterior, pasando de 43.553 –tres l'actualización de los datos a los llargo d'esta selmana– a 44.558 –los oficiales aumenten la cantidá nún casu más hasta los 44.559–. Supón una media diaria de 144, la primer xuba tres cuatro selmanes de descensu, frayando asina la tendencia de baxada de la tercer fola: 78, 101, 167, 292, 421, 482, 383, 226, 154 y 135.

No que se refier a la fin de selmana, detectáronse 138 el vienres, 134 el sábadu y 127 ayeri, con tases de positividá del 4,99 por cientu, 6,68 por cientu y y 5,92 por cientu, de manera respeutiva. A 7 díes, el sábadu esti porcentaxe yera del 5,7 por cientu.