Nengún fináu esti llunes con COVID-19 nuna xornada con 116 casos

La tasa de positividá quedó nun 5,22.

A falta de la espublización de los datos oficiales de la COVID-19, la Conseyería de Salú avanzó qu'ayeri nun hebo finaos cola enfermedá causada pol coronavirus SARS-CoV-2. Ye la segunda ocasión nesti 2021 que nun se rexistra nenguna muerte en 24 hores.

La vegada anterior foi tamién esti mes, el día 7, cuando se llevaben cinco meses sumando muertes xornada tres xornada, en concreto dende'l 11 d'ochobre. Dende qu'entamó l'andanciu hai que llamentar la perda de 1.891 persones.

No que respeuta a los contaxos, detectáronse un total de 116, 5 más que'l domingu. Fixéronse 3.221 pruebes de diagnósticu d'infeición activa, polo que la tasa de positividá asitióse en 5,22 por cientu, cuando'l día previu foi del 5,10 por cientu.

A 7 díes el domingu esti porcentaxe taba nun 5,13 por cientu –ayeri xubió al 5,19 por cientu–. La Organización Mundial de la Salú (OMS) marca un 5 por cientu como cifra referencia a partir de la que s'empieza a perder el control de la pandemia.

Hai 188 pacientes hospitalizaos en planta con confirmación o sospecha de COVID-19, 4 más que'l domingu, y 68 na UCI, 2 menos.

Llangréu prepara'l pal zarru perimetral

Esta medianueche actívense en Llangréu les restricciones del nivel d'alerta 4+, como ye'l casu del zarru perimetral o'l pieslle del interior de los chigres. Hasta'l momentu Siero yera l'únicu conceyu en riesgu estremu.

Pa consultar los indicadores de tolos llugares y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, puntu de vacunación del recintu ferial de Santuyano, onde dende esta mañana y hasta'l xueves van ponese dosis a 800 mayores de 80 años del área sanitaria VII.