Ameyoren los datos de la COVID-19 esti llunes

Detectáronse 103 contaxos, con una tasa de positividá diaria del 4,02 por cientu, y una baxada de la hospitalización. La nota negativa son les 3 muertes rexistraes na xornada.

A falta de la espublización de los datos oficiales de la COVID-19, la comunicación de la Conseyería de Salú dexa cifres qu'ameyoren les de díes pasaos. Los positivos ayeri foron 103, polos 127 del domingu, con una tasa de positividá inferior al 5 por cientu, en concreto del 4,02 por cientu tres la realización de 3.979 pruebes de diagnósticu d'infeición activa.

A 7 díes, esti porcentaxe yera'l domingu del 5,7 por cientu –l'actualización rebáxalu ayeri al 5,28 por cientu– nun momentu de frenu de descensu de la tercer fola pola presencia de la variante inglesa del coronavirus SARS-CoV-2, con más poder de tresmisión. Salú Pública confirmó ayeri que yá supón el 96,4 por cientu de los casos diagnosticaos anguaño.

Depués de la primer xornada dende ochobre ensin muertes por COVID-19 tenemos que tornar a llamentar finaos, un total de 3, dos homes de 81 y 74 años, y una muyer de 86. Dende qu'entamó l'andanciu perdieron la vida 1.804 persones –súmense 2 finaos más nos contabilizaos nos díes previos–.

Hai hospitalizaos 257 pacientes con confirmación o sospecha de la enfermedá causada pol coronavirus SARS-CoV-2, a los qu'hai que sumar 103 que tán na UCI. Son 21 y 3 menos que'l domingu.

Na semeya, salida d'ún de los dos últimos pacientes del hospital del xixonés Recintu Ferial Luis Adaro'l vienres pasáu.