Los estudiantes podrán tornar en Selmana Santa y el Gobiernu piensa nun cribáu pa los que vengan

La Comisión de Salú Pública refugó la propuesta del Ministeriu de Sanidá, qu'ha de ratificase'l miércoles nel Conseyu Interterritorial. Rexistráronse 159 contaxos esti xueves.

Les autonomíes, representaes polos direutores xenerales de Salú Pública, alcordaron xunto col ministeriu nesti órganu permitir la vuelta de los estudiantes a los sos llugares d'orixe nes vacaciones de Selmana Santa –anque col actual estáu d'alarma esta prohibición nun podría ser efeutiva llegalmente–. D'igual forma, dieron el preste a llendar la movilidá eses feches, el toque de queda de 22 a 6 hores y los aconceyamientos d'un máximu de 4 persones pa controlar l'espardimientu del coronavirus SARS-CoV-2, midíes yá vixentes n'Asturies.

Les recomendaciones tomaes ayeri pola Comisión de Salú Pública van llevase'l miércoles al Conseyu Interterritorial del Sistema Nacional de Salud pa la so aprobación, como asina paez que va ser daes les postures amosaes poles autonomíes, cola Comunidad de Madrid como la única contraria dafechu a les mesmes, a la que se suma Canarias refugando la torga de la movilidá. Por esti motivu, el Gobiernu d'Asturies yá estudia, según confirmó la so vocera Melania Álvarez García, facer pruebes PCR a los estudiantes que vengan al país, al igual qu'en Navidá, cribaos que tienen el fin de detectar positivos posibles enantes de que puedan contaxar a los sos familiares.

Trés finaos

A falta de la espublización de los datos oficiales de la COVID-19, la Conseyería de Salú confirmó 159 positivos ayeri. Son 24 más que'l miércoles, confirmándose asina'l frenu nel descensu motiváu pola alta tresmisión que tien la variante inglesa, agora predominante nel país, una situación qu'esmolez a les autoridaes sanitaries.

El Serviciu de Salú del Principáu d'Asturies (SESPA) fixo 3.673 pruebes de diagnósticu d'infeición activa, polo que la tasa de positividá ye del 6,21 por cientu, superior a la de la xornada anterior, cuando foi del 5,27 por cientu (3.873 tests). A 7 díes, el miércoles esti porcentaxe asitiábase nun 5,86 por cientu.

Hai que llamentar la muerte de 3 homes de 88, 74 y 73 años, polo que'l total de finaos nel andanciu cola enfermedá causada pol coronavirus SARS-CoV-2 queda en 1.792. Nos hospitales del país taben ayeri ingresaes 269 persones con confirmación o sospecha de COVID-19, 5 menos que'l día anterior, a los que se sumen 105 que tán na UCI, lo que supón una medra de 2 pacientes en cuidaos intensivos.

Na imaxe, Álvarez García na rueda de prensa posterior al Conseyu de Gobiernu d'esta mañana. Semeya obra d'Armando Álvarez.