“El 8-M y el movimientu feminista consiguieron conquistar el sentíu común de les mayoríes”, asegura Sara Combarros

Esti domingu ye 8 de marzu, Día Internacional de la Muyer, y la sociedá civil va tornar a tomar les places y cais del país baxo’l lema ‘Nosotres movemos el mundu’. “El 8-M y el movimientu feminista consiguieron conquistar el sentíu común de les mayoríes”, asegura Sara Combarros, vocera de la Comisión 8M Asturies, que lleva la manifestación a Uviéu pa convertila na "capital de les muyeres".

Tres dos fuelgues feministes de 24 hores con creciente siguimientu, el fechu de que’l 8-M cayera nesta ocasión en domingu llevó a les convocantes a da-y una vuelta a la xornada, entamando “una revuelta feminista” centrada sobre manera nos cuidaos. “Queremos visibilizalos. Siguimos siendo les muyeres les que cuidamos, les que sostenemos la vida nel día a día”, apunta Combarros, que recuerda que “los domingos tampoco nun paramos, cuidando y trabayando nel llar y fuera d'él”.

Nesi sen, la Comisión 8M Asturies quier alcordase d’una manera especial “de les internes, na so mayor parte migrantes y ensin papeles en situación vulnerable. Tamién de les muyeres “que trabayen na hostelería o nos centros comerciales qu’abren les sos puertes”, refugando “el modelu de consumu” que promueven éstos.

Al meudía y a les 17 hores

Baxo’l lema ‘Nosotres movemos el mundu’ el movimientu feminista asturianu pretende enllenar una vegada más al meudía les places de los ayuntamientos del país. De tarde, la reivindicación treslládase a Uviéu pa convertila “na capital de les muyeres” tres centrar les convocatories anteriores en Xixón, una decisión “con sentíu políticu, con motivu de la xestión del alcalde Canteli y los sos socios de Ciudadanos, cola que pretenden facenos retroceder al pasáu”.

A les 17 hores van salir de trés puntos de la ciudá trés columnes pa coincidir na plaza la Escandalera, “onde vamos entamar una aición sorpresa que llevamos meses preperando”. La primera, poles que cuiden, va tener el so puntu d’aniciu na plaza América; la segunda, poles que falten, de la Estación del Norte (Renfe); y la tercera, poles que vienen, de la cai Víctor Chávarri.

De la Escandelera tolos asistentes van siguir hasta la plaza la Catedral, onde va desendolcase l’actu final cola llectura de manifiestos. Más de cien coleutivos sofiten la convocatoria, dende partíos políticos a asociaciones pol derechu a la vivienda, mediambientalistes o sociales.

La intención de les convocantes ye repetir l’ésitu de los dos años anteriores, cuando miles de persones paralizaron Xixón, 100.000 na más próxima según la Comisión 8M Asturies, con persones abarrotando L’Humedal al empar qu’otres esperaben por salir de la plaza de toros. “Les reivindicaciones son les mesmes que nos dos años anteriores, nos que consiguimos visibilizales. Pero la mayor victoria foi que’l 8-M y el movimientu feminista consiguieron conquistar el sentíu común de les mayoríes. Treslladamos a la sociedá, de manera tresversal, que’l feminismu ye la única manera de vivir nuna sociedá más xusta y igualitaria pa toes y toos”.

Na semeya, Combarros, segunda de la derecha, mientres la presentación a la prensa de les exes centrales de la convocatoria pal 8-M d'esti añu.