Asturies torna a responder a la llamada feminista pol 8-M

Miles d’asturianes y asturianos enllenaron esti vienres 8 de marzu, Día Internacional de la Muyer, les places conceyu del país. La Universidá d’Uviéu, institutos y escueles tán paraes nuna xornada de fuelga feminista que va coronar una manifestación en Xixón que promete superar les impresionantes cifres del añu pasáu.

Paecía difícil superar lo vivío’l 8-M del 2018, pero l’asistencia de persones a les concentraciones convocaes al meudía en toles places conceyos del país foi entá mayor qu’hai un añu. “La fuelga ta siendo un ésitu total otra vegada”, apunta Sara Combarros, vocera de la Comisión 8M Asturies, que destacó’l enllenu que vivió la Plaza Mayor de Xixón.

Les otres dos grandes ciudaes asturianes, Uviéu y Avilés, tamién vivieron episodios similares, siendo coincidente ente los presentes un aumentu de l’asistencia con respeuto al 2018. Na capital llegó a entamase una marcha espontánea hasta la Delegación del Gobiernu estatal.

A les 19 hores

La fuelga feminista de 24 hores, baxo’l lema ‘Si nosotres paramos, párase’l mundiu’, organízase en cuatro exes: llaboral, de cuidaos, de consumu y educativu. A falta de datos oficiales, el siguimientu foi práuticamente total ente los alumnos universitarios y de la escuela pública, mentes qu’ente’l profesoráu foi d’ente’l 35 y el 40 por cientu, según apunta SUATEA.

Onde menos repercusión ta teniendo’l paru ye nel comerciu y na hostelería, asina como na industria. Esta tarde, a les 19 hores, el movimientu feminista va ufrir otra vegada una amuesa de fuercia con una manifestación que va salir de la plaza de toros y va finar en L’Humedal, onde va haber intervenciones de les voceres de la Comisión 8M Asturies y delles actuaciones musicales, como les de más de cien pandereteres de Nun Tamos Toes o del Coru Antifascista Al Altu la Lleva.

Na imaxe, un momentu de la concentración na Plaza Mayor de Xixón.