La promoción del asturianu medra un 6,17 por cientu nos Presupuestos, menos que nos del 2021

El proyeutu de Presupuestos del 2022 dedica a la promoción del asturianu 2.205.441 euros, un 0,04 por cientu del total, incluyíos los gastos de personal y corrientes de la Direición Xeneral de Política Llingüística. Son 128.170 euros más qu’esti añu, lo que supón una medra del 6,17 por cientu, inferior al del 2021, del 9,06 por cientu.

Esta mañana’l Gobiernu aprobó’l proyeutu de Llei de Presupuestos Xenerales del Principáu d’Asturies 2022, por un importe de 5.354 millones, 17 más que nel 2021. D’ellos 2.205.441 euros van pa la promoción del asturianu, polos 2.077.271 de les cuentes actuales y los 1.904.630 del 2019.

La inversión pa la normalización del idioma supón un aumentu del 6,17, inferior a la del añu pasáu, cuando s’asitió nel 9,06 por cientu al sumar 172.641 euros más. Ente les partíes programaes caltiénense los 100.000 euros pa la RTPA pa la realización de programes n’asturianu.

L’Academia de la Llingua Asturiana va recibir 10.000 euros más, un total de 240.000, mesma cantidá na qu’aumenta l’ayuda a medios de comunicación, que pasa de 100.000 a 110.000 euros. Una cantidá mui asemeyada va destinase a la edición, qu’esti añu contaba con 95.000 euros y pa la que nel 2022 dedíquense 109.400 euros.

La Sociedá Pública de Xestión y Promoción Turística y Cultural del Principáu d’Asturies va recibir 150.000 euros y la Universidá d’Uviéu, 14.000 pal serviciu de normalización llingüística. Pa los SNL de los conceyos va destinase la mesma cantidá qu’esti añu, cola perda del de Llaviana, que se suma al de Siero esti añu: 14.400 euros pa los de Cabu Peñes, Mieres, Llangréu, Ḷḷena, Cangas del Narcea, Samartín del Rei Aurelio, Corvera, Castrillón, Llanera, Grau-Candamo; 20.400 p’Avilés y la ‘Comarca de la Sidra’; y 21.849 p’A Veiga, mesma cantidá que recibe la Fundación Parque Histórico del Navia.

Los premios lliterarios y artísticos caltienen les mesmes recompenses. Mentes la Fundación Valdés-Salas recibe otros 24.000 euros pal Proyectu Fernán-Coronas, la Residencia Literaria 1863 cuenta con 4.610 euros pola ‘Beca Asturies de Lliteratura Asturiana en Residencia’, la Federación Asturiana de Conceyos con 86.000 euros y la Delegación asturiana pal Festival Interceltique de Lorient, certame que nel 2022 celebra l’Añu d’Asturies, con 15.000 euros.

Na imaxe, el presidente de la Xunta Xeneral, Marcelino Marcos, recibió d'Ana Cárcaba, conseyera de Facienda, el llápiz de memoria col proyeutu de llei de Presupuestos del 2022 pa entamar col trámite parllamentariu. Semeya obra de Nacho Vela.