La conseyería marca'l refuerzu de la Rede de Normalización Llingüística como oxetivu

Berta Piñán va comparecer na Comisión de Cultura, Política Llingüística y Turismu esti martes pa informar de les cuentes del so departamentu nos Presupuestos del 2021.

Los servicios de normalización llingüística activos del país van ver aumentaes les sos partíes nes cuentes de la conseyería pal 2021 dientro d'un proyeutu que va dir a Plenu'l día 23 p'afrontar la votación de les posibles enmiendes a la totalidá. La mayor parte d'ellos van recibir 5.000 euros más que nel 2020 pa poner el total en 19.400 euros (Cabu Peñes, Mieres, Llangréu, Ḷḷena, Cangas del Narcea, Samartín del Rei Aurelio, Corvera, Llaviana, Castrillón, Llanera, Grau-Candamu y Ribeseya) cola esceición d'Avilés, que ve xubir l'apotación en 6.000 p'algamar los 20.400 euros y Siero, inactivu, que nun cuenta con partida.

A Veiga y les entidaes qu’agrupen dellos conceyos como la ‘Comarca de la Sidra’ y la Fundación Parque Histórico del Navia aumenten tamién la so cantidá en 6.000 euros, polo que llegue a los 21.840 euros caún. La Conseyería de Cultura, Política Llingüística y Turismu esplica que toos "estos servicios van vese apoyaos al dotase, amás de coles partíes tradicionales dedicaes a contratación de personal, con recursos p'actividaes en materia d'educación y cultura que, al empar, refuercen la puesta en marcha de la Rede de Normalización Llingüística, na que trabaya'l Gobiernu".

5 millones pa la estación d'esquí de Valgrande-Payares

Otres partíes rescamplaes pol departamentu de Piñán, que va disponer de 59.956.572 euros l'añu viniente (un 26,89 por cientu más que nel 2020), son los 5 millones pal Proyeutu de Reconstrucción de la Estación Ivernal y de Monte de Valgrande-Payares como motor económicu del valle de Ḷḷena, los 600.000 euros pal Prerrománicu, los 200.000 a acondicionar el Camín de Santiago y los 450.000 pa la programación del Xacobéu 21. La conseyera va afondar mañana en tolos detalles de les cuentes na comparecencia informativa na Comisión programada pa les 9.30 hores na Sala Constitución de la Xunta Xeneral.

Na imaxe, Piñán intervién nel Plenu de la Xunta Xeneral del 24 de payares.