L’apoyu de Foro y d'IX garantiza qu'Asturies cuente con Presupuestos

Asturies va contar con Presupuestos esti 2021. La Federación Socialista Asturiana (FSA), que yá algamara un alcuerdu con Asturies pela Izquierda (IX-IAS), robló esti xueves con Foro’l so apoyu a les cuentes tres l’aceptación de delles de les sos propuestes y por “responsabilidá” depués de “escuchar les necesidaes de la sociedá asturiana”, aseguró'l secretariu xeneral forista Adrián Pumares.

“El Proyeutu de Llei de Presupuestos inclúi delles de les reclamaciones de Foro Asturias, como la inclusión de delles deducciones fiscales, l’entamu de les obres del Hospital de Cabueñes, l’apertura del segundo tramu del Plan d’Evaluación Docente o la non tributación del fondu de rescate pa los afecuados poles restricciones provocaes pola pandemia”, esplicó. Tamién destacó que “nun se xuban impuestos, dalgo fundamental nesta situación de pandemia”.

D’igual forma quixo dexar nidio que “esti alcuerdu presupuestariu nun implica, nin muncho menos, compartir toles actuaciones feches pol Gobiernu de Barbón, sinón que supón un exerciciu de responsabilidá nuna situación esceicional, na que’l conxuntu de la ciudadanía necesita seguridá y estabilidá”. De momento, IX y Foro yá roblaron cola FSA’l so sofitu a les cuentes, anque’l deséu de toles partes ye que los Presupuestos “cuenten col mayor consensu posible, como nos reclama la sociedá asturiana. Los representantes políticos nun podemos siguir comportándonos como si nun tuviéramos énte una situación escional na que trabayar en comuña”, apuntó Pumares.

Gimena Llamedo, secretaria d’Organización de la FSA, faló nel mesmu sen que'l diputáu de Foro, señalando que les negociaciones “nun paren equí” y que la intención ye “tratar d’averar postures y sumar a más fuercies polítiques” al consensu, cola mirada puesta sobre manera en Podemos y Ciudadanos. “Ye una buena noticia p’Asturies”, apuntó tres la robla del alcuerdu con Foro, escenificáu esta mañana nel uvieín Palaciu Conde Toreno, que garantiza al Gobiernu algamar los 23 votos necesarios pa sacar alantre los Presupuestos.

Na semeya, la vocera del grupu socialista na Xunta Xeneral, Dolores Carcedo; Llamedo; la conseyera de Facienda, Ana Cárcaba; Pumares; y Jaime Fernández-Paíno y Rosario Cabal, asesores del grupu parllamentariu y de materia económica de Foro, de manera respeutiva.