Les noticies más vistes del 2017 n'Asturies.com

La llista d'escueles que participen nel plan pilotu pal usu del asturianu como llingua vehicular en Primaria, puestu en marcha esti cursu, foi la noticia más vista nel 2017.

Esta información, tán esperada pola so importancia pa la normalización de la presencia del idioma na escuela, emplegándose n'otres materies diferentes a la de Llingua Asturiana y Lliteratura, en concreto nes árees de Ciencies Sociales, Ciencies Naturales, Educación Artística o Educación Física, foi la que demandó un interés mayor de los nuesos llectores. Entitulada 'Escueles d’Avilés, L’Entregu, Lieres, Carbayín, Grau y Mieres van estrenar el plan pa facer l’asturianu vehicular', incluyía la llista de centros que se sumaron de manera voluntaria al Plan Pilotu esperimental de Promoción del Usu del Asturianu en cuartu de Primaria, asina como datos sobre l'iniciu oficial del cursu n'Asturies.

Nesta llista que sigue va poder conocer los otros nueve artículos más lleíos del 2017 al tiempu que-y desamos un perbón 2018 nel qu'Asturies.com va continuar siendo fiel a la cita diaria cola información d'Asturies y del mundu.

1. Escueles d’Avilés, L’Entregu, Lieres, Carbayín, Grau y Mieres van estrenar el plan pa facer l’asturianu vehicular
2. Rodrigo Cuevas va actuar nel XXIX Conciertu pola Oficialidá
3. Javier Fernández entiende que cola so postura contra l’asturianu’l PP quier disputar "la derecha montuna" a Foro
4. La prensa americana anunciaba hai 80 años la creación d'un "estáu asturianu"
5. La propuesta de reforma constitucional del PSOE nun permitiría facer oficial l'asturianu depués d'aprobada
6. L’autocar d’HazteOír ye recibíu a pedraes
7. La FSA asume la oficialidá del asturianu nel so Congresu
8. "Dame tristura ver esti hemiciclu vacíu", afirma Pilar Rubiera
9. ‘Fálame’ va estrenase en TPA’l día 23
10. TPA va estrenar el doblaxe n’asturianu de ‘Ocean’s eleven’ nel Día de les Lletres Asturianes