L’autocar d’HazteOír ye recibíu a pedraes

|
Pedrada al autocar d'HazteOir

El polémicu autocar d’HazteOír, que fixo la so primer parada nel país na gasolinera de l’autopista en Viḷḷayana, foi recibíu a pedraes. La so intención ye la de llegar a Uviéu, onde yá se tán celebrando concentraciones de refugu na plaza de la Casa Conceyu.

Un piñu de persones, ente los que taben Daniel Ripa, secretariu xeneral de Podemos, esperó al vehículu col que HazteOír quier treslladar el so mensaxe intolerante per tol Estáu na gasolinera ḷḷeniza, como anunció’l propiu coleutivu ultracatólicu. Mientres dalgunos asistentes protestaben pola so presencia y el discursu que predica, xente amazcaritao llanzó piedes contra l’autocar, que darréu tomó direición hacia Mieres.

Na plaza de la Casa Conceyu d’Uviéu, ciudá oxetivu final de los ultracatólicos, hai movilizaes persones contraries a la llegada a Asturies del autocar. Nesta ocasión, HazteOír camudó’l lema qu’amuesa, qu’agora ye ‘Dejad a los niños en paz’.

“Respetamos y pedimos respeto para todas las personas, especialmente para los niños. Exigimos que no se obligue a los centros escolares a imponerles un determinado modelo de comportamiento sexual. Los niños son demasiado importantes y merecen todo el respeto. Por eso nos oponemos a que se les adoctrine en las aulas. Los niños tienen que ser niños. Dejad a los niños en paz”, esplica’l coleutivu nuna nota de prensa na que denuncia estrozos nel vehículu. Nun primer momentu, el mensaxe que s’amosaba yera ‘Los niños tienen pene. Las niñas tienen vulva. Que no te engañen’.

Nel audiu axuntu, pue sentir les declaraciones de Ripa.

Semeya propiedá d'HazteOir baxo llicencia CC BY-SA 2.0.

Contador Estadistiques