Escueles d’Avilés, L’Entregu, Lieres, Carbayín, Grau y Mieres van estrenar el plan pa facer l’asturianu vehicular

|
Escueles d’Avilés, L’Entregu, Lieres, Carbayín, Grau y Mieres van estrenar el plan pa facer l’asturianu vehicular

El cursu comenzó n’Infantil y Primaria con 48.441 escolinos matriculaos na escuela pública y 19.109 na privada-concertada. La gran novedá esti añu ye la puesta en marcha Plan del Plan Pilotu esperimental de Promoción del Usu del Asturianu en cuartu de Primaria de seis centros d'otres tantes poblaciones del país.

Éstos son La Carriona-Miranda (Avilés), El Bosquín (L’Entregu), Xentiquina (Lieres), El Cotayu (Carbayín), Bernardo Gurdiel (Grau) y Santiago Apóstol (Mieres). Los neños y neñes d’estes escueles van dar una materia de les árees de Ciencies Sociales, Ciencies Naturales, Educación Artística o Educación Física n’asturianu, en total una hora selmanal, siempre de manera voluntaria, amás de l’asignatura propia de Llingua Asturiana y Lliteratura.

Na inauguración del cursu escolar ayeri en Colombres, el conseyeru d’Educación y Cultura, Genaro Alonso, defendió esti plan y criticó la postura del PP contra’l mesmu, echando-y un cara a los populares qu’en Galicia caltengan una posición contraria dafechu con respeuto a la llingua propia. Sobre’l númberu d’alumnos que van participar nel Plan Pilotu esperimental de Promoción del Usu del Asturianu aseguró nun tener datos entovía.

Descensu d’alumnos

La baxada de la natalidá provoca que nesti cursu haya 950 escolinos menos n’Infantil y 1.094 en Primaria con respeuto al cursu pasáu. En total, comenzó con 67.550 alumnos, de los que el 71,71 por cientu tán matriculados na escuela pública: 48.441 por 19.109 na concertada.

Na semeya, el Colexu Públicu La Carriona-Miranda, ún de los seis centros que se sumaron al plan impulsáu pola Conseyería d'Educación y Cultura.

Contador Estadistiques