La propuesta de reforma constitucional del PSOE nun permitiría facer oficial l'asturianu depués d'aprobada

|
Pedro Sánchez

Nel 2015 los socialistes presentaron un documentu nel que proponen que les llingües oficiales apaezan mencionaes na Constitución | La FSA quier posponer el debate sobre la oficialidá tres la nueva norma magna, pero según el modelu del PSOE esto nun sedría téunicamente posible.

El documentu socialista cola so propuesta de reforma constitucional, propón elevar l’estatus de les llingües actualmente oficiales, dándo-yos rangu constitucional. Asina, la nueva versión de la carta magna, d’aprobase la propuesta socialista, mencionaría espresamente a catalán/valencianu, gallegu y vascu como llingües oficiales del Estáu, xunto col castellanu, eliminando la fórmula d’anguaño, na que la cooficialidá establezse nel testu estatutariu de cada comunidá.

Lo que propón la FSA

La FSA ta acabante anunciar que la so propuesta de cooficialidá, ratificada nel so Congresu, fadríase efectiva nel Estatutu d’Autonomía asturianu, depués de l’aprobación de la nueva Constitución, pero según el modelu del PSOE, esto nun sedría téunicamente posible, anque ye probable que se-y pudiere dar a la llingua asturiana un estatus de proteición inferior al de les otres llingües. En concreto, el documentu socialista fala de, na nueva constitución, “ameyorar el réxime de cooficialidá de les llingües d’España col oxetivu d’afitar el so reconocimientu como llingües d’Estáu y la garantía de llibertá d’usu, ensin discriminación, de cualquiera de les llingües oficiales nos territorios de les sos respeutives comunidaes”.

Énte esta situación, si la propuesta respeuto a les llingües oficiales del PSOE ye asumida pol PP, la meyor garantía de que l’asturianu pueda ser oficial y los sos falantes tener los mesmos derechos que los d’otres llingües, ye la so oficialidá previa nos términos nos que s’establez na constitución vixente; nel testu estatutariu. Asina, si l’asturianu ye oficial nel Estatutu, de dase la mención constitucional a les llingües oficiales, l’asturianu sedría ún de los idiomes que s’incorporaríen al testu constitucional al selo yá primero de la reforma.

Depués de la reforma constitucional, siempre según la propuesta del PSOE, nun valdría con facer una reforma estatutaria n’Asturies, sinón que fadría falta una reforma nueva de la carta magna del estáu pa facer oficial l’asturianu.

Semeya del PSOE d'Extremadura baxo llicencia CC BY 2.0.

Contador Estadistiques