La FSA asume la oficialidá del asturianu nel so Congresu

La enmienda, defendida na comisión de derechos ciudadanos del 32 congresu de la FSA-PSOE por María Luz Pontón, militante d’Uviéu, consiguió facese con más del 52% d’apoyos, frente al 31% del non, y un 11% d’astenciones. L’ALLA felicitase y felicita a tolos asturianos pola decisión de la FSA-PSOE.

El domingu nel plenariu del 32 Congresu de la FSA-PSOE, la resolución de la comisión 'Asturies inclusiva y garante de derechos' qu’incluyía asumir l’apoyu a la oficialidá del asturianu, consiguió los siguientes votos de los delegaos: Sí 223 (82%) / Non 36 (13%) / As. 13 (5%). Esta enmienda llegó al Congresu col apoyu de les agrupaciones que representen al 75% de la militancia. 

Dende Socialistes pola oficialidá, autores d'esta enmienda al Programa Marcu consideren que ye un cambiu de postura hestóricu y que pon a los socialistes asturianos del "llau de la defensa de los drechos llingüísticos y la cultura asturiana".
 
Pa esti grupu de militantes, tar pola oficialidá ye pal PSOE lo natural y entra dientro de les sos señes d’identidá “na defensa y el reconocimientu de los drechos y de la plena igualdá xurídica de tolos ciudadanos y ciudadanes”. Por eso quiere celebrar esta xornada hestórica pa la llingua asturiana y pal partíu, que se suma al consensu social a favor de da-y futuru a la llingua asturiana. “Los socialistes somos exemplu en toles comunidaes autónomes con llingües propies y agora, cola defensa de la oficialidá, atopamos la solución afayadiza pal idioma, que nun ye otra que la marca la Constitución”.

Tamién como novedá y un exemplu d'esti cambiu dientro de la FSA ta la Comisión Executiva Autonómica escoyía onde apaez una Secretaría de Educación, Universidaes y Normalización Llingüística que tará a cargu de la citada María Luz Pontón Álvarez.

L’ALLA felicitase y felicita a tolos asturianos y asturianes pola decisión de la FSA-PSOE

Esta mañana l'Academia de la Llingua Asturiana (ALLA) quiso sumase al reconocimientu d'esti fechu que munchos consideren históricu y emitió un comunicáu nel que gracies esti cambiu de postura fai posible enanchar el consensu políticu pa facer vidable una reforma del Estatutu que lleve a la tan naguada oficialidá.

Esti ye'l comunicáu completu de l'ALLA:

"La llingua y la cultura d’Asturies vienen teniendo a lo llargo de les caberes décades un desendolcu innegable dende’l puntu de vista de la so codificación y
normativización, del puxu algamáu pola so lliteratura, de los llogros de la so escolarización, etc. Al empar, les actitúes sociales y les demandes al rodiu de la normalización algamen posiciones calteníes y nidiamente mayoritaries ente la ciudadanía d’Asturies.

Llamentablemente, estos avances nun se vieron acompangaos de les midíes xurídiques que contempla la Constitución Española pa les respeutives llingües
autonómiques y que pasaron –en tolos casos, menos nel asturianu– pel reconocimientu del estatus llegal d’oficialidá. Hai que dicir, nesti sen, que la denomada Llei d’Usu del Asturianu amosó, llueu de cuasi 20 años de vixencia, les sos insuficiencies a la hora de facer vidable la sobrevivencia del idioma asturianu: nin se xeneralizó la enseñanza en toles estayes educatives, nin se garanticen los derechos profesionales del profesoráu (especialidá docente), nin hai medios de comunicación públicos dafechu n’asturianu, nin hai promoción efeutiva del so usu n’espacios formales de comunicación...

Nestes circunstancies, una llingua minoritaria y minorizada como la nuesa nun podría tener futuru como llingua de cultura n’Asturies. La demanda de la oficialidá foi y sigue siendo, acordies colo anterior, la esixencia permanente d’una parte mui importante de la sociedá y de les instituciones asturianes, práuticamente dende la transición política.

L’Academia de la Llingua Asturiana (ALLA), acordies cola so función tutelar de los derechos llingüísticos de los asturianos, siempres demandó a les instancies
polítiques la busca d’un consensu políticu al rodiu de la oficialidá del asturianu (y del eonaviegu o gallego-asturianu nes sos llendes territoriales), a vegaes énte la indiferencia ya incomprensión de los partíos mayoritarios n’Asturies.

Pues bien, l’ALLA nun pue sinón felicitase y felicitar a tolos asturianos y asturianes pola decisión de la FSA-PSOE d’amestar a les sos llinies programátiques la demanda de la oficialidá de la llingua hestórica del pueblu asturianu. Ello féxose esti caberu fin de selmana, solemne ya inequívocamente, dientro de los alcuerdos del so XXXII Congresu, celebráu n’Uviéu ente’l 29 de setiembre y el 1 d’ochobre.

Somos conscientes de que tal decisión –qu’emocionó a munchos de los delegaos y delegaes asistentes al Congresu– llega años dempués de qu’otros partíos asturianos parllamentarios la amestaren al so ideariu políticu, pero nun podemos por ello resta-y importancia. Con esta decisión, la FSA-PSOE, el partíu mayoritariu n’Asturies de magar el restablecimientu de la democracia, fai posible enanchar el consensu políticu pa facer vidable una reforma del Estatutu que lleve a la tan naguada oficialidá.

Ye una decisión que merez la reconocencia y el respetu de l’ALLA y que foi posible porque asina lo quixeron los militantes socialistes, pero tamién pola mor de
l’anovación (xeneracional y estratéxica) d’unos dirixentes que, como Adrián Barbón, quieren abrir nuevos calces na so rellación cola llingua y la cultura d’Asturies.

A nós, como Academia de la Llingua Asturiana, tócanos agora collaborar pa que’l determín de los socialistes asturianos encaxe coles espeutatives ciudadanes que
demanden un billingüismu social equilibráu ente asturianu y castellanu na nuesa comunidá y tamién pa tender pontes d’entendimientu ente les estremaes fuerces
polítiques. Ye, cenciellamente, afitar un idioma milenariu, el nuesu."