"L'asturianu y el castellanu son llingües oficiales d'Asturies. El gallego-asturiano tamién ye oficial nel so ámbitu territorial"

Podemos y Izquierda Xunida (IX) rexistraron esti vienres na Xunta Xeneral la propuesta de modificación de reforma del Estatutu d’Autonomía pa incluyir la oficialidá del asturianu y del gallego-asturiano nel so ámbitu territorial. El martes el documentu va llegar a la Mesa de la Cámara, primer pasu del procesu.

"L'asturianu y el castellanu son llingües oficiales d'Asturies. El gallego-asturiano tamién ye oficial nel so ámbitu territorial y nes rellaciones de la ciudadanía cola Alministración autonómica”, reza la propuesta de Podemos sofitada por IX pal primer párrafu del artículu 4 del Estatu d’Autonomía. La redaición sigue col testu siguiente: “Una llei de la Xunta Xeneral afitará’l réximu d’usu y aplicación nes distintes alministraciones, tanto del asturianu como del gallego-asturiano. / Tola ciudadanía tien derechu de conocer y emplegar de forma llibre les llingües oficiales n’Asturies, y nenguna persona podrá ser discriminada en función de la llingua oficial que s’emplegue”.

El testu, que cuenta con una amplia esposición de motivos, va llegar a la Mesa de la Cámara’l martes, primer pasu d’un ampliu procesu que s’allargaría previsiblemente hasta abril, dependiendo de lo que se dilaten los plazos de cada pasu, cuando se votaría en Plenu. Les comparecencies, por cuestión de fecha, celebraríense depués del debate de prespuestos, abriéndose’l periodu d’enmiendes pa febreru y el comienzu de les ponencies pa marzu.

Enantes deberá superar l’alderique de toma en consideración, pa lo que ye necesario la mayoría absoluta de la cámara, esto ye, 23 diputaos. Podemos y IX cuenten con 14, polo que necesitaría l’apoyu de la FSA, que yá anunció la so negativa a tratar esti asuntu nesta llexislatura. La fecha prevista pa esti debate clave ye la selmana cabera de payares o la primera d’avientu, según confirmaron dende la coalición.

Na semeya, Ramón Argüelles, coordinador xeneral d'IX, rexistra la propuesta acompañáu de Daniel Ripa, secretariu xeneral de Podemos, y diputaos y representantes de dambes formaciones.