Podemos y Izquierda Xunida alcuerden abrir el procesu pa la reforma del Estatutu pa declarar la oficialidá del asturianu nesta llexislatura

|
Podemos y Izquierda Xunida alcuerden abrir el procesu pa la reforma del Estatutu pa declarar la oficialidá del asturianu nesta llexislatura

El voceru del Grupu Socialista, Marcelino Marcos, considéralo un "postureo" por parte d'estes formaciones.

Nel alcuentru celebráu esta tarde del martes na Xunta Xeneral ente Podemos Asturies y Izquierda Xunida, alcordaron entamar aína los trámites pal rexistru na Xunta Xeneral d'una iniciativa qu'abrá'l procesu de reforma del Estatutu d'Autonomía y asina pa poder aprobar la so reforma na qu'incluya la oficialidá de la llingua asturiana primero que remate esta llexislatura. Una vegada rexistrada, quieren falar col restu de les fuercies parlamentaries, yá que los sos votos nun son abondos pa poder aprobar la reforma estatutaria plantegada.

Dende Podemos, el responsable de Derechos Llingüísticos, Lluismi Orviz, esplicó que les dos formaciones lleven un añu trabayando sobro esti tema "con total cordialidá y alcuerdu". Agora, dempués de 'un tiempu de reflexón pa buscar más sofitos, apuesten por nun perder la oportunidá' nesta llexislatura "una vegada que la FSA incorporó la oficialidá, esto ye, reconocer los drechos de los asturianos y asturianes falantes cola cooficialidá del asturianu nel Estatutu". Dexando una reforma más amplia del actual Estatutu pa la siguiente llexislatura.

El secretariu d'Organización d'Izquierda Xunida, Alejandro Suarez, esplicó qu'el so partíu va sumase a aquelles iniciatives empobinaes a llograr la máxima reconocencia llegal al asturianu. “La posición d'IX cola tema de la oficialidá ye histórica y, por tanto, cuando un grupu propónnos xuninos a ello, vamos facelo, y siempres que se plantegue esti alderique nós vamos tar a favor”. A xuiciu del secretariu d'Organización d'IX d'Asturies, esiste necesidá pa la oficialidá. Alejandro Suárez esplicó que l'oxetivu ye llevar a la Xunta lo más aína una propuesta que dexe'l so discutiniu a tolos grupos buscando'l máximu sofitu.

Al respective d'esta iniciativa, el voceru del Grupu Socialista, Marcelino Marcos, noma de "postureo" la decisión de dambos partíos d'empecipiar la reforma del Estatutu. Amás, enfea a Podemos la so pretensión de modificar esta norma a la trágala cuando ayeri mesmu, na Xunta de Voceros, intentaba que la so proposición de llei sobro categoríes profesionales sanitaries fixésese por llectura única y trámite d'urxencia porque "yá nun había tiempu p'aplicar una tramitación ordinaria no que queda de llexislatura". "Sicasí pa reformar l'Estatutu sí hai tiempu", enféalos. Pal voceru del Grupu Socialista esta iniciativa amuesa la frivolidá de Podemos y la poca considerancia que-yos merez l'Estatutu al tar dispuestos a reformalu namái polos sos intereses electorales.

Contador Estadistiques