“La oficialidá va ser dalgo real; será pronto”

|
XDLA Xunta Xeneral Plenu apertura reforma Estatutu oficialidá

La Xunta Xeneral votó nun abrir agora’l procesu de reforma del Estatutu d’Autonomía pa incorporar la oficialidá colos votos de la FSA, PP, Foro y Ciudadanos. Podemos y IX confíen n’algamala nun futuru cercanu y los socialistes aseguren que van respetar les resoluciones congresuales de cara al so programa eleutoral.

“La oficialidá va ser dalgo real. Si nun ye agora, será pronto”, aseguró Andrés ‘Ron’ Fernández Vilanova, en representación de Podemos, na primer intervención del alderique pola propuesta de reforma del Estatutu pa la modificación del artículu 4 que presentó’l so partíu xunto con Izquierda Xunida (IX). La redaición concreta yera la siguiente: "L'asturianu y el castellanu son llingües oficiales d'Asturies. El gallego-asturiano tamién ye oficial nel so ámbitu territorial y nes rellaciones de la ciudadanía cola Alministración autonómica. / Una llei de la Xunta Xeneral afitará’l réximu d’usu y aplicación nes distintes alministraciones, tanto del asturianu como del gallego-asturiano. / Tola ciudadanía tien derechu de conocer y emplegar de forma llibre les llingües oficiales n’Asturies, y nenguna persona podrá ser discriminada en función de la llingua oficial que s’emplegue”.

Depués de sumar los 12 diputaos –una cuarta parte de la Cámara– que marca la vía del artículu 56.1 del Estatutu, al contar con 14 ente los dos, nun se pudo superar la barrera de los 23 –mayoría absoluta– qu’afita’l Reglamentu de la Xunta Xeneral, polo que’l procesu viose frenáu. 30 parllamentarios votaron en contra presentando diferentes argumentos –hebo una ausencia–, por 14 a favor.

Ron y Cocha Masa encargáronse de defender la postura de los dos proponentes. El representante de Podemos quixo desmontar el discursu típicu de los contrarios a la oficialidá, catalogando de falsu cuestiones como’l costu y “la pretensión nacionalista”. “Valió de mentires”, afirmó, pa depués dirixise a la popular Mercedes Fernández y recordar declaraciones pasaes del socialista Fernando Lastra énte la sorpresa d’ésti.

La diputada d’IX calificó’l debate abiertu cola propuesta de “grandísimu pasu alantre de tola sociedá. “Continuaremos sumando fuercies hasta consiguilo”, aseguró pa depués definir la llingua asturiana como un “núcleu vital de la nuesa identidá”.

Llei d’Usu y Catalunya

Los voceros parllamentarios del restu de grupos foron los que tomaron darréu la pallabra. El primeru foi’l de Ciudadanos, Nicanor García Fernández, qu’acusó a Podemos y IX de dexar fuera del alderique “una realidá qu’esiste n’Asturies pero que nun se menciona: la Llei d’Usu”.

“Paez que tamos nun estáu de persecución del bable, que sólo se pue salvar cola oficialidá, y nun ye asina”, aseguró depués d’afirmar que cola Llei d’Usu pue emplegase l’asturianu con total llibertá o escribir nesta llingua. “Ye un debate oportunista y con una intención política”, siguó enantes de recordar el costu de la oficalidá faciendo referencia a los 20 millones que cuantifica l’Academia de la Llingua Asturiana y criticar a IX por nun facer nada cuando taba nel Gobiernu col PSOE.

Pedro Leal, de Foro, consideró “inoportuno plantegar aiciones como ésta porque perxudica la proteición del patrimoniu llingüísticu”. Aseguró que’l modelu del so partíu ta na non imposición, refugó llevar a Asturies “un modelu catalán, vascu o inclusive gallegu”, y señaló que’l debate de la oficialidá “ta realizándose al rebufu del desafíu secesionista catalán”.

Tamién afirmó que “el marcu afayadizu” pal asturianu “deber partir de la Llei d’Usu, que tien muncho camín per delantre –nun tien nin un reglamentu–, frente a la cooficialidá copiada del País Vasco o Cataluña”. Por último aseguró que “les dos campañes radicales enfrentaes con intereses partidistes” tán faciendo dañu al idioma.

Amenaces personales

La popular Mercedes Fernández centró tolos focos cola so intervención. En primer llugar señaló qu’esti alderique yera “importante y interesante, porque afeuta a la vida de los asturianos nel ámbitu familiar y llaboral. Cambia a la sociedá asturiana”.

Darréu refugó que sía posible “una cooficialidá amable”, criticó’l costu –qu’asitió “en 70 o 80 millones d’euros” –, recordó que la Llei d’Usu aprobóla “un Gobiernu del Partido Popular”, sumóse a les crítiques a IX por nun facer “por aplicar la cooficialidá” cuando gobernaba en coalición cola FSA, calificó de baxos los porcentaxe na escolarización en Llingua Asturiana venceyándolo con un desinterés de les families y criticó a Ron y a Masa porque’l so discursu n’asturianu “nun-yos salió del corazón, nin del gargüelu. Tuvieron que lleelo; y trabucándose”. Foi nesti momentu cuando Fernández comenzó a introducir pallabres n’asturianu acusando a los diputaos de nun “falar asina” nin d’emplegar “el bable que falamos colos nuestos padres ensin trabucanos y ensin pallabres inventaes que nin siquier tán bien diches”.

Sicasí, apuntó que “nun digo que nun haya demanda social, digo que nun ye mayoritaria n’Asturies”. Lo siguiente, depués de criticar a Ron y a Gaspar Llamazares, foi denunciar amenaces y ataques de calter machistes baxo mazcaritu dende que s’abrió esti alderique “por defender no que creo, dalgo que nunca nun me pasara”.

Tamién negó que per Asturies, “cuando salimos tolos miércoles cola furgoneta, porque nun tenemos más que p’alquilar una furgoneta”, la xente fale esi asturianu que s’emplegó “en cachos d’una intervención que nun entendí”, en referencia a Ron, que-y fixera previamente referencia a les salides de Fernández nesti vehículu. “La cooficialidá amable y una transición enerxética xusta sos coses falses”, finó’l so discursu la popular.

Respetu al programa y a les resoluciones congresuales

Zarró l’alderique’l socialista Marcelino Marcos, qu’apuntó que pal so grupu parllamentariu plantegar agora la reforma del Estatu “nun ye oportunu pol momentu procesual nel que tamos. Nun nos paez serio. Sí almitiríamos a alderique una proposición non de llei o’l debatir los avances del Gobiernu na materia, pero non esti posturéu con fines eleutoralistes”.

“Respetamos el programa eleutoral, a los nuesos votantes y a los que nun nos votaron”, siguió Marcos, que recordó a Mercedes Fernández la so postura hai 20 años con respeuto a la oficialidá. Tamién a los diputaos de Foro de la de Francisco Álvarez-Cascos, pa lo que, nos dos casos, tiró d’hemeroteca.

“Ta nidio cuál ye l’itinerariu que tenemos que siguir: respetar el programa y les resoluciones congresuales. Vustedes sabíen de sobra lo que díbemos a votar güei”, finó’l voceru socialista confirmando asina que la oficialidá tará nel próximu programa eleutoral de la FSA.

Na imaxe, militantes de la XDLA siguen el Plenu dende la Xunta Xeneral como públicu. Semeya obra d'Ivan G. Fernández.

Contador Estadistiques