“Ye una cuestión de calidá democrática que’l gallego-asturiano sía oficial en tol territoriu”, diz Xeira

|
Pancarta gallego-asturiano mani Día de les Lletres 2018

L’Asociación Cultural Xeira defende un tratu igualitariu del gallego-asturiano col asturianu “nuna posible oficialidá”. “Ye una cuestión de de calidá democrática que’l gallego-asturiano sía oficial en tol territoriu”, afirma’l so presidente Xabiel G. Menéndez.

La propuesta presentada por Podemos y Izquierda Xunida (IX) pa la modificación del artículu 4 del Estatutu d’Autonomía comienza col testu “l'asturianu y el castellanu son llingües oficiales d'Asturies. El gallego-asturiano tamién ye oficial nel so ámbitu territorial y nes rellaciones de la ciudadanía cola Alministración autonómica”. Esta redaición que fadría que’l gallego-asturiano nun fora oficial en tol territoriu vien “por presiones de poderes fácticos en temes llingüísticos”, señala Menéndez, que, sicasí, ye optimista nun cambiu de postura de les dos formaciones d’izquierda.

Xeira defende’l mesmu plategamientu que la Xunta pola Defensa de la Llingua Asturiana (XDLA): que los dos idiomes sían oficiales n’Asturies n’igualdá col castellanu y qu’una llei de normalización posterior marques los sos ámbitos y territorios d’usu. “Nun tamos en contra de la oficialidá; namái queremos ameyorala y que nun haya ciudadanos de primera y de segunda”, apunta Menéndez.

En xunu asoleyóse un manifiestu robláu por más de 300 persones y dellos coleutivos del occidente ‘Por un trato igualitario na oficialidá d’asturiano y galego-asturiano’, ente los que taba Xeira. L’asociación cultural insiste nesti sentir “pa nun dar pie a agravios comparativos” y demanda una declaración d’oficialidá que sería simbólica por quedar darréu marcaos de manera nidia los respeutivos ámbitos d’usu de los dos idiomes nel desenvolvamientu llexislativu posterior al traviés d’una llei de normalización.

Na semeya, un piñu de ciudadanos reclama la oficialidá del gallego-asturiano na manifestación pola oficialidá del últimu Día de les Lletres Asturianes.

Contador Estadistiques