La torna al gallegu y el mirandés del poema de Bello sobre'l coronavirus, noticia más vista nel 2020

Dexamos atrás un añu que va quedar pa siempre marcáu na nuesa memoria y nos llibros d’Historia, y recibimos el 2021 col habitual repasu a les noticies más vistes d’Asturies.com nos 365 díes previos, nesti casu 366 por ser 2020 bisiestu. La información sobre la torna al gallegu y el mirandés d’un poema de Xuan Bello sobre’l coronavirus lleváu enantes al catalán y l’eusquera, foi la más lleida.

El 18 de marzu espublizábamos la noticia ‘El poema de Bello sobre'l coronavirus, tamién en gallegu y mirandés’, que daba continuidá a una previa del 13 de marzu, entitulada ‘Bello escribe un poema sobre'l coronavirus qu'escritores tornen al catalán y eusquera’–, la séptima más vista del añu. La información sobre la creación lliteraria de Bello del miércoles 12 de marzu, espublizada na rede social Facebook nun momentu de muncha incertidume, nos díes previos a l’estáu d’alarma y el confinamientu, y les traducciones feches de manera espontánea por autores collacios del de Paniceiros del asturianu a les sos llingües propies, tuvo munchu ecu fuera d’Asturies, lo qu’esplica la cantidá tan alta de llectures.

L'escritor valencianu Manel Alonso i Català foi’l primeru, al que-y siguió’l vascu Gerardo Markuleta. Llueu la gallega Yolanda Castaño y l'Associaçon de Lhéngua i Cultura Mirandesa fixeron lo propio.

La llista

Estes tornes del poema de Bello a otres llingües ocupen la primer y sétima posición de la llista, que darréu ufrimos completa al tiempu que-y deseamos un perbón 2021 nel qu'Asturies.com va siguir siendo fiel a la cita diaria cola información d'Asturies y del mundu.

1. El poema de Bello sobre'l coronavirus, tamién en gallegu y mirandés
2. Auschwitz 75 años depués: Pattist, el nazi que vivió y morrió impune n’Asturies
3. L’ex direutor de ‘ABC’ desvela una llamada de Javier Fernández pa dar batalla contra la oficialidá
4. Un videu n'asturianu sobre'l consumu de productos del país faise viral en redes sociales
5. Pasu históricu na normalización: Barbón usa la llingua asturiana na rueda de prensa
6. L’horru d’El Pedrosu, con pintures de la guerra contra los franceses, cayó énte la pasividá de propietarios y alministraciones
7. Bello escribe un poema sobre'l coronavirus qu'escritores tornen al catalán y eusquera
8. “El turismu vien a Asturies a buscar una identidá, qu’inclúi tamién la llingua”, afirma Piñán
9. La bandera, la mayor herencia del 25 de mayu
10. “La oficialidá ye Asturies y el que tea a la escontra la oficialidá ta escontra d’Asturies”, asegura García Corte

Semeya recortada, propiedá de Donostia Kultura, baxo llicencia CC BY-SA 2.0.