Pasu históricu na normalización: Barbón usa la llingua asturiana na rueda de prensa

|
Adrián Barbón rueda de prensa n'asturianu

Esta mañana Adrián Barbón usó l'asturianu nuna de les sos respuestes na rueda de prensa sobre les novedaes rellacionaes cola COVID-19 y el pasu'l llunes a la fase 3.

Un fechu qu'habría ser normal, que'l presidente asturianu mande la llingua del país, convirtióse güei nuna de les novedaes d'una rueda de prensa na que tamién participó Asturies.com, que fixo les sos entrugues usando la llingua vehicular d'esti mediu.

Nun yera la primer vegada que se facíen a presidentes del nuestru gobiernu entrugues n'asturianu nuna rueda de prensa, pero sí ye la primer intervención espontánea n'asturianu d'un presidente autonómicu, nesti casu p'afayase a la llingua na que facía'l mediu la entruga.

El propiu Gobiernu Asturianu difundía la respuesta del presidente nes sos redes sociales:

Ye dicir, esta mañana pudimos asistir a un pasu pequeñu pero d'un simbolismu grande na historia de la normalización del asturianu: que la máxima autoridá del país emplegue la llingua asturiana con normalidá nuna intervención o un discursu que nun tea rellacionada cola propia llingua.

Esti fechu tuvo darréu repercusión nes redes sociales nes que foi comentao por dellos usuarios, como Justo Braga que compartió la intervención n'asturianu del presidente col comentariu "@AdrianBarbon contesta en Asturiano. Esto ye la normalidá"

Semeya obra d'Armando Álvarez.

Contador Estadistiques