“La oficialidá ye Asturies y el que tea a la escontra la oficialidá ta escontra d’Asturies”, asegura García Corte

|
Aitor García Corte XXIV Fiesta de la Oficialidá de la Llingua Asturiana de Bimenes

Bimenes celebró esti sábadu la XXIV Fiesta de la Oficialidá de la Llingua Asturiana magar nun poder contar coles actividaes habituales nesta xornada que conmemora la declaración de oficialidá del 5 de xunetu del 1997. “La oficialidá ye Asturies y el que tea a la escontra la oficialidá ta escontra d’Asturies”, aseguró l'alcalde Aitor García Corte nuna declaración institucional.

“Ye la única manera de garantizar una sociedá xusta, avanzada, plural y solidaria”, añadió'l primer edil na Casa Conceyu nun actu que s’emitió al tol mundu al traviés d’Internet y qu’entamó –y zarró– una interpretación de pareya de gaita y tambor, y siguió con una llectura de poemes de Berta Piñán y unes pallabres d’Artur Nunes, presidente de la Cámara Municipal de Miranda de l Douro, territoriu portugués hermanáu con Bimenes onde’l mirandés, del tueru asturlleonés, ye oficial. “El pueblu asturianu somos bien torcíos: cuanto más nos diga daquién una cosa más nos encerriscamos nello. Qu’hailos que nun quieren que falemos na llingua de los nuesos güelos y pás, pues nada, a falala, y munchu meyor, a reivindicala” señaló’l cabezaleru d’Asturianistes por Bimenes nun discursu lleíu a comuña con otros ediles de la corporación.

Yerbates y yerbatos recuerden con esta folixa, marcada esti añu pola pandemia de COVID-19, la declaración d’oficialidá en Bimenes del 1997, baxu mandatu de mandatu del alcalde Joaquín ‘Xuacu’ García Gutiérrez, torgada un añu depués pol Tribunal Superior de Xusticia d’Asturies (TSXA) al considerar que’l Conceyu nun tenía competencia pa ello. García Corte, que llevaría a Plenu la mesma cuestión nel 2016, aprobándose tamién, naguó por poder celebrar “esti día d’hermanamientu y dignidá” l’añu qu’entra.

Teatru en Santuyano

De tarde, la Casa Cultura de Santuyano acoyó la representación de la obra ‘Muyeres na mina’, a cargu del Grupu de Teatru de l’Asociación Cultural Maura Xeva, con aforu reducíu y toles midíes de seguranza tanto p’actores como pal públicu.

Publicada por Ayuntamientu Bimenes en Sábado, 4 de julio de 2020

 
Contador Estadistiques