La selmana de les restricciones nueves zarró con una media de 421 contaxos diarios

Yá son catorce los conceyos del país en riesgu estremu. En Samartín del Rei Aurelio entren esti llunes les midíes; el martes, en Ḷḷena; y el miércoles van facelo n'Ayer.

Un total de 2.948 contaxos se detectaron n'Asturies na selmana na que se punxeron en marcha les restricciones nueves pa trata de frenar l'espardimientu del coronavirus SARS-CoV-2. Ésta principió con 30.803 y zarró con 33.751 –los datos oficiales incorporen 27 más que ponen el total en 33.778–, lo que supón una media de 421 casos nuevos de COVID-19 diarios polos 292 de l'anterior nuna tendencia claramente ascendente: tres los 78 de la selmana del 21 al 27 d'avientu siguióse con 101 y 167 hasta llegar a los númberos actuales, los más altos dende'l periodu 9-15 de payares, cuando hebo 508.

El vienres rexistróse per cuarta xornada siguida'l récor de la tercer fola con 511, superando los 503 del xueves –507 nos datos oficiales–. El sábadu la cifra baxó a 336, anque ayeri tornó a superar el mediu millar, en concreto 503.

La tasa de positividá tamién ta en númberos altos, superiores inclusive a los de la segunda fola. El vienres asitióse nun 10,24 por cientu, el sábadu nel 12,37 por cientu y ayeri nel 12,01 por cientu tres la realización de 4.819 pruebes de diagnósticu d'infeición activa, mentes qu'a 7 díes ye del 9,93 por cientu.

No que respeuta a les muertes, hai que llamentar un total de 26 esta fin de selmana, 15 muyeres y 11 homes. 8 tuvieron llugar el sábadu y 9 el vienres y ayeri, que ponen el total dende l'entamu del andanciu en 1.473.

Hai nestos momentos hospitalizaos 443 pacientes con confirmación o sospecha de COVID-19, a los qu'hai que sumar 70 que tán na UCI. Son 87 y 10 más que'l xueves, de manera respeutiva.

Grau sigue n'alerta 4+

La llista de conceyos coles resticciones nueves nun aparen de medrar. Los últimos son Samartín del Rei Aurelio, con midíes actives dende güei, Ḷḷena y Ayer, onde van entrar mañana y pasao, de manera respeutiva.

Tán en nivel 4+ (riesgu estremu) anguaño, amás, Aviés, Castrillón, Corvera, Uviéu, Llanes, Cangas del Narcea, Gozón, Noreña, Xixón y Mieres. Grau, con una situación especial dende'l día 12, cumple mañana les dos selmanes de restricciones, que van siguir pero coles midíes comunes al restu de territorios n'alerta.

Na semeya, plaza Ramón y Cajal en Sotrondio, cola Casa Conceyu de Samartín del Rei Aurelio, últimu sitiu onde entraron les restricciones nueves, al fondu.