482 contaxos diarios de media na selmana última

Salú tranca la hostelería d'Avilés, Castrillón y Corvera, ente otros midies, al prorrogar el zarru perimetral otros 14 díes. Con Valdés y Siero son 17 los conceyos con restricciones.

A falta de la espublización de los datos oficiales de la COVID-19, la conseyería comunicó 1.185 casos nuevos esta fin de selmana: 479 el vienres, 373 el sábadu y 333 ayeri. Con estes cantidaes de contaxos, la selmana peslló con un total de 3.372 positivos al pasar de 33.778 a 37.150 –l'actualización aumentó esta cantidá en 89 por casos non contabilizaos en díes anteriores, polo que punxo'l total en 37.239–.

Ello supón una media diaria de 482, siguiendo cola tendencia ascendente de xineru. Dende de la selmana del 21 al 27 d'avientu, cuando hebo 78, siguióse con 101, 167, 292 y 421, rexistrándose la cifra más alta agora dende'l periodu 9-15 de payares, cuando se rexistraron 508.

No que respeuta a la tasa de positividá, la más alta foi ayeri, con un 11,54 por cientu, mentes que'l vienres quedó nun 10,09 por cientu y el sábadu nun 9,45 por cientu. A 7 díes, el xueves el porcentaxe taba nun 10,73 por cientu –l'actualización colos datos del domingu báxala a un 10,29 por cientu–.

Esta fin de selmana hebo que llamentar 23 muertes cola enfermedá causada pol coronavirus SARS-CoV-2, 16 homes y 7 muyeres: 8 el vienres, 11 el sábadu y 4 ayeri. El total de finaos dende qu'entamó l'andanciu asciende yá a 1.530.

Hai nestos momentos hospitalizaos 583 pacientes con confirmación o sospecha de COVID-19, a los qu'hai que sumar 100 que tán na UCI. Son 102 y 9 más que'l xueves, de manera respeutiva.

Les normes nueves

Cola intención de "impidir el colapsu del sistema sanitariu" y, ente la evolución de los datos, Salú decidió declarar restricciones más dures a les xenerales pa los conceyos en nivel d'alerta 4+ p'Avilés, Castrillón y Covera pa llendar la interacción social y la movilidá. Prórrogase 14 díes más el zarru perimetral dende mañana, cuando se va suspender l'apertura al públicu de los establecimientos d'hostelería y restauración, incluyíes les terraces; el pieslle d'establecimientos comerciales de más de 300 metros cuadraos; y la prohibición d'accesu de públicu n'acontecimientos deportivos y culturales en direuto.

Otra manera, güei entraron a valir les midíes por riesgu estremu en Valdés, y mañana van facelo en Siero. Con estos dos conceyos yá son diecisiete los afeutaos, llista na que tamién tán Grau, Uviéu, Llanes, Cangas del Narcea, Gozón, Noreña, Xixón, Mieres, Samartín del Rei Aurelio, Ḷḷena, Ayer y Salas.

Pa consultar la situación de tolos conceyos y les midíes vixentes en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, la direutora xerente del SESPA, Concepción Saavedra; Fernández Muñiz; y el direutor xeneral de Salú Pública.