El llunes rexistráronse 426 casos nuevos

Son 77 menos que'l domingu, con una tasa de positividá de 9,93 por cientu, nuna xornada con 4 finaos. Actívense esti martes les restricciones en Ḷḷena por riesgu estremu.

A falta de la espublización de los datos de la COVID-19, la Conseyería de Salú comunicó 426 contaxos ayeri. Supón una baxada con respeuto a los últimos díes, yá que'l xueves, el vienres y el domingu superóse'l mediu millar de casos nuevos.

Fixéronse 5.519 pruebes de diagnósticu d'infeición activa, polo que la tasa de positividá foi del 9,11 por cientu, inferior a la del día anterior, que s'asitió nel 12,01 por cientu. La última actualización apuntaba qu'a 7 díes esti porcentaxe yera del 9,93 por cientu.

4 persones perdieron la vida cola enfermedá causada pol coronavirus SARS-CoV-2: trés homes de 89, 75 y 74 años y una muyer de 88, de los que trés residíen nun centru de mayores. Dende qu'entamó l'andanciu acumúlense un total 1.477 muertes.

Hai nestos momentos 452 hospitalizaos con confirmación o sospecha de COVID-19, a los qu'hai que sumar 74 que tán na UCI. Son 9 y 4 más que'l día anterior, de manera respeutiva.

Carreño y Valdés podríen ser los siguientes

Les restricciones a los conceyos en nivel d'alerta 4+, qu'inclúin el zarru perimetral, entraron a valir güei en Ḷḷena, mentes que van facelo mañana n'Ayer. Con ellos son yá catorce los que tán en riesgu estremu (Grau, Avilés, Castrillón, Corvera, Uviéu, Llanes, Cangas del Narcea, Gozón, Noreña, Xixón y Mieres), a los que se podríen xunir Valdés y Carreño nel casu de nun ameyorar les sos cifres na xornada.

Pa consultar la situación de tolos territorios y les midíes actives en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, La Pola Ḷḷena. Semeya obra d'Osmio-4 baxo llicencia CC BY-SA 3.0.