Sigue l'ascensu de contaxos, con una media de 292 diarios na selmana última

320 mayores y trabayadores de la Residencia Mesta de Pumarín yá recibieron la segunda dosis de la vacuna, siguiendo los plazos. Van tener inmunidá a la COVID-19 en 7 díes.

A la espera de conocer los datos oficiales y la primer llista de los conceyos nos que se van afitar mayores restricciones según los requisitos anunciaos pola Conseyería de Salú'l sábadu, Asturies rexistró 870 casos nuevos de COVID-19 esta fin de selmana –l'actualización última incorpora otros 21 non rexistraos en díes anteriores–: 356 el vienres, 242 el sábadu y 272 ayeri, cuando se fixeron 3.490 pruebes de diagnósticu d'infeición activa, polo que la tasa de positividá asitióse nel 9,63 por cientu tres dos díes superando'l 10 –a 7 díes ye del 9 por cientu–.

Na selmana última detectáronse 2.055 contaxos al pasar de 28.736 a 30.782 (qu'ascienden a 30.803 tres l'actualización), lo que supón una media diaria de 292 na selmana última, cuando na anterior esta cifra foi de 167. D'esta forma sigue la evolución ascendente dientro de la tercer fola que vivimos, tres algamar 78 na selmana del 21 al 27 d'avientu: 101, 167 y los 292 actuales.

Esta cantidá ye la más alta dende'l periodu que va del 16 al 22 de payares, cuando los casos nuevos diarios algamó la cifra de 344.

13 finaos

Estos trés díes perdieron la vida cola enfermerdá causada pol coronavirus SARS-CoV-2 13 persones, 7 muyeres y 6 homes: 1 el vienres, 7 el sábadu y 5 el domingu. Dende que principió l'andanciu yá se sumen 1.411 muertes.

Hai 273 pacientes hospitalizaos con confirmación o sospecha de COVID-19, a los qu'hai que sumar 65 que tán na UCI. Son 32 y 8 más que'l xueves, de manera respeutiva.

22 díes depués

Personal sanitariu encargáu de l'alministración de les vacunes tornó esta mañana a la Mesta de Pumarín, en Xixón, onde entamó la campaña de vacunación el 27 d'avientu, pa poner la segunda dosis. 270 residentes –ente ellos Eulalia Josefa Paleo 'Pepita', la primera en recibila n'Asturies– y 50 trabayadores cumplieron asina coles indicaciones de les farmacéutiques Pfizer/BioNtech pa contar con inmunidá énte la COVID-19, que van algamar nuna selmana.

Na imaxe, Pepita recibe la segunda dosis. Semeya obra de POOL/ EuropaPress/ Jorge Peteiro.