Supérense los 500 contaxos esti xueves

Torna a rexistráse'l récor de la tercer fola per tercer xornada siguida. Xixón y Mieres entren en nivel d'alerta 4+ y dende'l domingu van tener les restricciones nueves per 14 díes.

La Conseyería de Salú informó de 503 contaxos ayeri –los datos oficiales incorporen 4 más non contabilizaos, hasta los 507–. Son 61 más qu'ayeri cuando s'anotaron 442 (nun primer momentu yeren 434) y la cantidá más alta dende'l 13 de payares, día récor de tola pandemia, cuando se detectaron 793 casos nuevos (807 col recuentu de cifres).

El Serviciu de Salú del Principáu d'Asturies (SESPA) fixo 5.591 pruebes de diagnósticu d'infeición activa, polo que la tasa de positividá s'asitió nun 10,09 por cientu, práuticamente idéntica a la del día anterior, cuando foi del 10,06 por cientu. La tasa de positividá a 7 díes ye del 9,27 por cientu.

Na xornada finaron once personas: siete muyeres de 98, 95, 95, 92, 88, 88 y 85 años, y cuatro homes de 99, 94, 86 y 67, de los que 3 vivíen en residencies de mayores. Dende qu'entamó l'andanciu yá se contabilicen 1.447 muertes cola enfermedá causada pol coronavirus SARS-CoV-2.

Hai nestos momentos 356 hospitalizaos con confirmación o sospecha de COVID-19, 16 más que'l miércoles, a los qu'hai que sumar 60 personas que tán na UCI, 3 menos que'l día anterior.

Once conceyos en riesgu estremu

Xixón y Mieres súmense a los conceyos en nivel d'alerta 4+, de riesgu estremu, polo que'l domingu van entrar a valir les restricciones nueves establecíes pola Conseyería de Salú per 14 díes, llista a los que se podríen añadir próximamente Samartín del Rei Aurelio y Ḷḷena si nun ameyores los sos datos. Güei entamaron en Gozón y mañana van facelo en Noreña, mentes que n'Uviéu, Llanes y Cangas del Narcea lleven dende ayeri y n'Avilés, Castrillón y Corvera, dende'l martes.

Casu aparte ye Grau, con midíes más estrictes dende'l día 12 polo biltos provocaos poles fiestes navidiegues. Pa consultar la situación de tolos conceyos y les restricciones en caún d'ellos l'Observatoriu de Salú n'Asturies tien activu un mapa na so web, na pestaña 'Mapas medidas'.

Na semeya, una terraza en Xixón, únicu llugar que podrán trabayar los chigres d'esti conceyu dende'l domingu.