“La política llingüística ye tresversal y pue encontrase nos diferentes programes de les conseyeríes”, rescampla Gutiérrez

“Que la dirección xeneral constituyida aúna l’acción cultural y la normalización llingüística tien que ver cola visión de la tresversalidá y la propia esistencia d’esta viceconseyería dependiente direutamente del presidente”, defendió Ana Vanessa Gutiérrez. La responsable de Cultura, Política Llingüística y Turismu presentó en comisión les cuentes del so departamentu pal proyeutu de Presupuestos pal 2024.

La escritora intervieno na parte final de la media hora que correspuende a la conseyera correspondiente, nesti casu la de Presidencia, Retu Demográficu, Igualdá y Turismu, Gimena Llamedo, de la que depende esta llexislatura la viceconseyería, pa detallar les partíes principales y oxetivos que se quieren algamar coles mesmes. “Trayemos un proyeutu de presupuestos que supón un saltu cualitativu y cuantitativu pa la promoción y desarrollu de l’actividá física y el deporte y pal desarrollu de la cultura n’Asturies”, principió.

Darréu especificó que “ta pensáu pa marcar un puntu d’inflexón nestes materies desplegando esta dotación –60 millones y mediu d’euros– per tol territoriu cola fin de garantizar trés derechos básicos: l’accesu universal a la cultura, la protección y difusión de les nueses llingües propies y l’interés xeneral de l’actividá física y del deporte”. Ente los proyeutos “más ambiciosos qu’esta viceconseyería tien sobre la mesa” citó “la modificación y el desarrollu normativu, como ye’l casu de la Llei d’Usu o la d’Actividá Física y Deporte; l’impulsu de les lleis de biblioteques, museos y archivos, y de l’Axencia d’Industries Creatives d’Asturies; o la ellaboración de proyeutos como’l Plan de Normalización Llingüística, la radiografía de los sectores culturales y deportivos o la redacción de planes estratéxicos pal patrimoniu, la cultura o pal deporte tradicional”

“Estos proyectos”, siguió, “son pilares que sustenten la estratexa de xestión sobre la que pivota esti proyeutu de presupuestos, si bien parte de l’aición dirá tamién encaminada a la coordinación col restu de departamentos conscientes de la relevancia y la tresversalidá d’estes materies pa les que darréu dirá convocándose meses sectoriales y intersectoriales”. Nel restu de la intervención citó dalgunes de les novedaes en política llingüística que depués repitiría y ampliaría nuna respuesta a una entruga del diputáu de Foro, Adrián Pumares, “polos cambios fundamentales en rellación a presupuestos anteriores”.

Diferencia de la normalización y la política llingüística

“Les principales novedaes d’esti presupuestu, la dirección xeneral constituyida qu’aúna l’acción cultural y la normalización llingüística yá ye en sí mesma una gran novedá porque tien muncho que ver cola visión de la tresversalidá y la propia esistencia d’esta viceconseyería dependiente direutamente del presidente”, entamaba Gutiérrez. “La política llingüística ye tresversal y tamién se pue encontrar nos diferentes programes de les diferentes conseyeríes d’esti Gobiernu, non esclusivamente nel presupuestu de la viceconseyería”, defendió.

Darréu esplicó que “la viceconseyería diferencia tamién per un llau la normalización llingüística de la política llingüística en cuanto qu’hai acciones que tienen que ver con desarrollu normativu, con estratexa y coordinación d’otres árees de l’Alministración”, y la “parte de normalización llingüística vinculada a la promoción y l’actividá de la que s’encarga la Dirección Xeneral d’Acción Cultural y Normalización Llinguística”. Y ente les novedaes citó “l’ascensu del presupuestu a l’Academia de la Llingua, tamién una demanda por parte de la institución y mui necesaria pa que puedan desarrollar los sos proyeutos, una institución amás abierta a la ciudadanía y investigadores que cumple un papel mui importante; una nueva llinia destinada al sector audiovisual de creaciones n’asturianu y eonaviegu; un premiu d’asturianada que va tener trés categoríes, un impulsu importante pa esta manifestación cultural tan identitaria de los asturianos; o’l premiu a guiones escritos n’asturianu o eonaviegu, un apoyu tamién que demanden los sectores y que va ser importante pa ellos”.

Na semeya, Gutiérrez a la derecha xunto a Llamedo y tres d'ella, Antón García, direutor xeneral d'Aición Cultural y Normalización Llingüística, que nun intervieno na sesión.