Los Presupuestos dediquen 100.000 euros a una llinia nueva d'ayudes a la producción audiovisual n’asturianu

El conseyeru de Facienda y Fondos Europeos, Guillermo Peláez, entregó na Xunta Xeneral el proyeutu de llei de Presupuestos Xenerales pal 2024. Cola estructura nueva la política llingüística encáxase na Direición Xeneral d’Aición Cultural y Normalización Llingüística, que cuenta con un presupuestu de 14.340.276 que caltién les principales partíes y inclúi dalguna novedá como 100.000 euros pa producción audiovisual o un premiu nuevu de guión n’asturianu o gallego-asturiano.

Les cuentes previstes pal 2024 (6.348 millones d'euros, un 6 por cientu más), pendiente d'aprobación nel Parllamentu, dexa un pequeñu aumentu nes cifres dedicaes a la política llingüística. Les ayudes a medios de comunicación pa la normalización sigue en 110.000 euros y a empreses en 70.000, mentes que les de publicaciones xube de 109.400 a 110.000.

La gran novedá ye la incorporación d'una llinia de subvención nueva con 100.000 euros a empreses pa la producción audiovisual n'asturianu. Ésta ye independiente a la tan cuestionada a la RTPA pa la "promoción del asturianu", tamién de 100.000 euros.

L'Academia de la Llingua Asturiana va ver aumentada la cuantía que recibe de los Presupuestos en 60.000 euros, de los 240.000 del 2023 a 300.000 euros. Mentes, la Universidá d’Uviéu va siguir contando con una partida de 19.600 pa la promoción del asturianu nel ámbitu universitariu.

Mesmes cifres pa los servicios de normalización llingüística nos conceyos

No que respeuta a los servicios de normalización llingüística nos conceyos, caltiénense les mesmes cifres. Les mancomunidaes de la Comarca de la Sidra, Cabu Peñes y Valle del Nalón, asina como’l Conceyo da Veiga y la Fundación Parque Histórico del Navia reciben 21.840 euros; Avilés sigue con 20.400; y el restu, Mieres, Llangréu, Ḷḷena, Cangas del Narcea, Corvera, Castrillón, Llanera, Grau-Candamu y Cabrales, con 19.400.

Los Premios Lliterarios mantienen los 45.000 euros en recompenses, mentes que los artísticos pasen de 12.000 a 27.000, lo que da a entender que podríen crease categoríes nueves. Los Presupuestos sí inclúin 6.000 euros pa un “premiu de guión n’asturianu/eonaviego”.

Otra manera, la inversión d’esti 2024 pa la Delegación Asturiana nel Festival Interceltique de Lorient aumenta de los 15.000 a los 20.000 euros, la Fundación Valdés Sala caltién los 24.000 pa los trabayos sobre’l Padre Galo, la Federación Asturiana de Conceyos 131.500 pal programa d’educación non reglada p’adultos Falamos, la Residencia Literaria 1863 los 4.610 pa la beca ‘Asturies’ y sigue la partida de 50.000 euros pa “normalización del asturianu”.

Na semeya, el presidente de la Xunta Xeneral, Juan Cofiño, recibe de Peláez el llápiz de memoria col proyeutu de Presupuestos Xenerales pal 2024.