Los premios artísticos van incorporar ún destináu a l’asturianada

La viceconseyera de Cultura, Política Llingüística y Deporte, Ana Vanessa Gutiérrez, presentó en Bimenes les partíes principales del so departamentu nel proyeutu de llei de Presupuestos Xenerales pal 2024. Ente les nos especificaes nes cuentes rescampló la creación d’un premiu artísticu más, que se dedica a l’asturianada, con trés categoríes.

Hasta’l momentu dientro d’esta estaya, a la que se dedicaben 12.000 euros, incluyíense al Premiu Camaretá al Meyor Cantar, que yá va pola so decimoquinta edición, y el Premiu Nel Amaro de Teatru Profesional en Llingua Asturiana o Gallego-asturiano, qu’acumula siete. Nes cifres feches públiques el día 1 reflexábase un aumentu nesta partida de 15.000 euros, hasta los 27.000, que se van destinar a la creación d’esti gallardón nuevu.

Ésti ta “destináu a l’asturianada” y “va contar con trés categoríes: la masculina, la femenina y la moza”, avanzó’l sábadu Gutiérrez. Ye una de les novedaes d’esti añu nunos presupuestos que tamién incorporen 100.000 euros pa producción audiovisual o un premiu nuevu de guiones cinematográficos n’asturianu o gallego-asturiano al que se destinen 6.000 euros.

Na estaya de la política llingüística la escritora tamién citó l’incrementu nel apoyu a l’Academia de la Llingua Asturiana, que va recibir 60.000 euros más, de los 240.000 d’esti añu a los 300.000, y la continuación nel desendolcu de ferramientes de traducción automática “que consideramos que ye fundamental”. Na so intervención tamién recordó la decisión del Gobiernu de modificar la Llei d’Usu y Promoción del Bable/Asturiano del 1998.

Un presupuestu de 60 millones

“Les nueses prioridaes pasen pola normalización llingüística, l’apoyu a les entidades llocales pa garantizar l’accesu universal de la cultura, con especial interés naquelles zones menos poblaes, onde l’actividá cultural s’afita como ún de los sos principales motores económicos y, consecuentemente, por apoyar la profesionalización y el desendolcu de los sectores culturales”, resumió la viceconseyera, que va manexar un presupuestu de 60.571.774 euros “que suponen un aumentu del 13,48 por cientu con respeuto al 2023, que tán pensaos pa impautar nel territoriu y nes diverses necesidaes de los sectores culturales”. La Direición Xeneral d’Aición Cultural y Normalización Llingüística, que tien al frente a Antón García, va disponer de 14.340.276 euros.

Nes otres materies sobre les que tien competencies la viceconseyería hai que destacar, en pallabres de Gutiérrez, “una inversión ensin precedentes na restauración del patrimoniu cultural d’Asturies”. Van dedicase 25.842.910 euros distribuyíos en dos programes: ún, destináu a les instituciones culturales, dotáu con 17.149.979 euros, y otru, de patrimoniu cultural, que xube a 8.692.931 euros.

El Prerrománicu va recibir 700.000 euros con actuaciones como la creación d’una sienda peatonal ente Santa María del Naranco y Samiguel de Lliño, y el plan de castros, 300.000. Otra manera, les ayudes pa la restauración d’horros medren en 100.000 euros, hasta llegar a los 450.000.

Na semeya, l'alcalde Aitor García Corte, Gutiérrez y Manuela Fernández Ena, direutora xeneral d'Actividá Física y Deporte, el sábadu en Bimenes, onde los representantes del Gobiernu visitaron l'edificiu que diba acoyer la piscina.