González Orejas detalla pa qué se destinen los 100.000 euros pa RTPA

El direutor xeneral en funciones del ente tornó a reclamar a los grupos parllamentarios la ellaboración del mandatu marcu qu'afite los porcentaxes d'emisión n'asturianu.

Los dos diputaos del grupu mestu, Adrián Pumares por Foro y Cova Tomé por Podemos, treslladaron entrugues a Francisco González Orejas nel so turnu de 30 minutos compartíu, aprovechando la so presencia na sesión de la Comisión de Facienda y Fondos Europeos pa presentar les cuentes nel proyeutu de llei de Presupuestos Xenerales pal 2024 de la Conseyería de Presidencia, Retu Demográficu, Igualdá y Turismu, sobre "qué midíes, a falta d'esi contratu marcu qu'interpela permanentemente a esta Xunta Xeneral, van poner en marchar pa potenciar la llingua asturiana na radiotelevisión pública del Principáu"; y sobre la partida de 100.000 euros pa la promoción del asturianu y del gallego-asturiano, que calificó de "simbólica teniendo en cuenta lo que cuesta cualquier producción audiovisual", y les midíes "pa que les llingües propies d'Asturies tengan un espaciu dignu" na RTPA, de manera respeutiva. Enantes de dar la pallabra al responsable, la conseyera Gimena Llamedo espresó que dicha tresferencia tien l'oxetu de "siguir apostando pola incorporación de la llingua asturiana na televisión pública asturiana".

"En RTPA facemos producción en llingua asturiana o tenemos en cuenta l'asturianu y el gallego-asturiano más allá de dicha cantidá", espresó González Orejas, que detalló qu'esos 100.000 euros dedíquense "a la promoción en sentíu estrictu, a les campañes pa la promoción del estudiu de la llingua nes escueles, pa la Selmana de les Lletres, etc., amás de la cobertoria de la retresmisión d'actos como'l Premiu al Meyor Cantar y otres actividaes, como dende'l 19 l'actu central de la Selmana de les Lletres de l'Academia de la Llingua Asturiana". Nesi puntu aprovechó pa recordar que "la concreición definitiva de qué facer col asturianu y el gallego-asturiano o eonaviego en RTPA vendría determinada pola esistencia d'un mandatu marcu qu'afite eso que se llamen los porcentaxes de programación: información, cultura, deportes, entretenimientu, etc., y nel casu comunidaes que disponen d'una llingua, como ye'l nuestu casu, del usu del asturianu".

Pa finar, apuntó como "novedá o como incrementu del usu del asturianu esti añu" la incorporación d'un resume coles noticies principales al acabar la segunda edición de 'TPA Noticias'. Tomé, pela so parte, dio-y la razón en qu'esi mandatu marcu "yá urxe".