"Queremos trabayar y reunir más a los servicios de normalización", apunta la viceconseyera

Ana Vanessa Gutiérrez señaló que ye necesariu un análisis y estudiu previu pa poner en marcha l'Axencia d'Industries Creatives d'Asturies.

Cova Tomé, amás de pola partida de 100.000 pa RTPA "pa la promoción del asturianu", treslladó a la viceconseyera de Cultura, Política Llingüística y Turismu otres dos entugues. Una centróse esclusivamente na Rede de Normalización Llingüística y la falta d'una cuantía económica concreta pa ella, a lo que la escritora esplicó que se constituyó "en parte como un instrumentu de trabayu, un grupu de trabayu, diálogu y asesor, que nun tien una consignación presupuestaria con una partida propia precisamente porque en gran parte ye un trabayu de coordinación, pero hasta'l momentu lo que sí que se vien faciendo ye atender les necesidaes dende otres programes de la propia dirección xeneral y asina ta previsto que suceda tamién en 2024".

Nesti puntu quixo agradecer "el trabayu y les aportaciones de los servicios de normalización al traviés de la Rede porque nel últimu añu por exemplu participaron en númberoses actividaes, en numberosos proyectos, como pue ser el documentu de llinguaxe alministrativu n'asturianu nel que se ta trabayando y que próximamente vamos poder ver". "Dicho esto, si ye cierto que queremos trabayar más y reunir más a estos servicios de normalización, anque somos conscientes de que tienen munchu trabayu, porque naide meyor qu'ellos, que tán apegaos a cada conceyu y a les necesidaes de cada territoriu, puedan treslladanos a la viceconseyería les necesidades de cada llugar y de los propios servicios", añadió.

120.000 euros pa 'estudios, trabayos técnicos y proyectos d'investigación'

La diputada de Podemos tamién s'interesó pola Axencia d'Industries Culturales y Creatives d'Asturies. Al igual que na cuestión anterior, "paez que nun se ve reflexada concretamente nos Presupuestos", apuntó Tomé.

Gutiérrez aseguró que dichu organismu "tien una importancia capital pal desarrollu de les industries culturales d'Asturies y pa ello tenemos que facer un análisis previu tanto de los recursos humanos disponibles na Alministración pública como los recursos económicos", rescamplando que, al igual que la política llinguística, "la política cultural ye tresversal a otres conseyeríes", y por ello "necesitamos saber con qué contamos pa poder facer una bona reestructuración". Tamién cree positivo "conocer  y estudiar los modelos d'otres axencies que puedan arriquecer esti procesu de creación de l'Axencia Asturiana de les Industries Culturales".

Por último, esplicó que "pa ello nun ye qu'haya una partida específica pa les industries culturales, pero sí hai una partida de 'estudios, trabayos técnicos y proyectos d'investigación' nel programa de la Dirección Xeneral d'Acción Cultural y Normalización Llingüística que ta dotada con 120.000 euros na que se prevén los posibles costes qu'esti tipu d'estudios, igualmente como pue ser la radiografía de los sectores culturales, que ye complementaria y necesaria tamién pa poder dimensionar les necesidaes d'esta axencia qu'esperemos poder ver pronto".

Na semeya, Gutiérrez.